សម្តេច ហ៊ុន សែន ពន្យល់រឿងចាប់ខ្លួនមន្ត្រីសុរិយោដីខេត្តពោធិ៍សាត់

2019-07-29 03:13:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានបញ្ជាក់ថា ការចាប់ខ្លួនមន្រ្តីសុរិយោដីខេត្តពោធិ៍សាត់ចំនួន៣នាក់ គឺពាក់ព័ន្ធនឹងករណីប្រព្រឹត្តអំពើពុករលួយទារលុយខុសច្បាប់១០ម៉ឺនដុល្លារ ពេលមានក្រុមហ៊ុនមួយសុំច្បាប់សាងសង់។ ការថ្លែងនេះ ធ្វើឡើងក្នុងពេលអញ្ជើញចុះពិនិត្យការដ្ឋានសាងសង់ពហុកីឡដ្ឋានជាតិមរតកតេជោ នៅសង្កាត់ព្រែកតាសេក ខណ្ឌជ្រោយចង្វារ នាព្រឹកថ្ងៃទី២៩ ខែកក្កដា ឆ្នាំ២០១៩។

រូបថត៖ ហ្វេសប៊ុកលោក ស ថេត

សម្តេចពន្យល់យ៉ាងដូច្នេះថា៖ «អារឿងចាប់មន្រ្តី៣នាក់មកពីពោធិ៍សាត់ រឿងវាដូច្នេះ គេត្រូវកសាងរោងចក្រ ហើយខ្ញុំបានទៅប្រកាសបើករោងចក្រនៅកន្លែងហ្នឹង។ ដល់ពេលគេសុំសាងសង់ វាទារលុយគេ។ ដំបូងវាត្រឹម ៥ម៉ឺន (ដុល្លារ) ទេ ដល់ក្រោយមក ខ្ញុំធ្វើការជាមួយអង្គភាពប្រឆាំងអំពើពុករលួយ ឱម យ៉ិនទៀង ស្រាវជ្រាវរឿងហ្នឹង។ គេឱ្យមន្រ្តីក្លែងបន្លំចូលទៅ ធ្វើជាម្ចាស់ក្រុមហ៊ុន។ អានោះ វាឡើងថ្លៃមួយទ្វេជាពីរ ពី ៥ម៉ឺនដល់ ១០ម៉ឺន ទារកក់ ៥ពាន់។ ខាង ACU គេក៏កក់ ៥ពាន់។ ស្អែកឡើងត្រូវយក ៤ម៉ឺន ៥ពាន់ទៀត យកទៅកក់ ឱ្យបានគ្រប់ ៥០% ។ អ៊ីចឹងថ្ងៃទីមួយកក់ ៥ពាន់ ថ្ងៃទី២ ៤ម៉ឺន ៥ពាន់ ។ កក់រួចហើយ យកមក (ចាប់ខ្លួន) តែម្តង»។

សម្តេចបញ្ជាក់ថា នេះជាអភិក្រមទី៥ ដែលត្រូវអនុវត្តគ្មានការលើកលែង។ «ហែងបំផ្លាញជាតិ បំផ្លាញរដ្ឋបាលរបស់ហ៊ុនសែន»។ សម្តេចក៏បានឱ្យស្រាវជ្រាវដកហូតទ្រព្យសម្បត្តិពីមន្រ្តីទាំង៣រូបនេះ ថែមទៀតផងដែរ។

គួររំលឹកថា កាលពីព្រឹកថ្ងៃទី២៧ ខែកក្កដា ឆ្នាំ២០១៩ អង្គភាពប្រឆាំងអំពើពុករលួយ បានចាប់ខ្លួនប្រធាន អនុប្រធាន និងមន្ត្រីមន្ទីរសុរិយោដីខេត្តពោធិ៍សាត់។ ការចុះចាប់ខ្លួននេះ គឺដឹកនាំដោយលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ។

អ្នកដែលចាប់ខ្លួនមានឈ្មោះ៖

១. ឈ្មោះ លៀម ប៊ុនរឿម ប្រធានមន្ទីរសុរិយោដីខេត្តពោធិ៍សាត់

២. ឈ្មោះ ជាង វុទ្ធី អនុប្រធានមន្ទីរទទួលការងារសំណង់

៣. ឈ្មោះ តែ ប៊ុនថេង មន្ត្រីសុរិយោដីខេត្ត៕