រាជរដ្ឋាភិបាលដាក់វិធានការទប់ស្កាត់ការនាំចូលជ្រូក និងផលិតផលពីសាច់ជ្រូកដោយខុសច្បាប់

2019-07-31 08:37:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រាជរដ្ឋាភិបាលកម្ពុជាដាក់ចេញវិធានការឲ្យស្ថាប័នពាក់ព័ន្ធទប់ស្កាត់ការនាំចូលដោយខុសច្បាប់នូវជ្រូក សាច់ជ្រូក និងផលិតផលដែលមានដើមកំណើតពីសាច់ជ្រូកគ្រប់ប្រភេទ ខណៈជំងឺប៉េស្តជ្រូកអាហ្រ្វិកបានរាលដាលដល់ខេត្តប្រាំរបស់កម្ពុជា។

រាជរដ្ឋាភិបាលកម្ពុជានៅថ្ងៃនេះបានចេញសារាចរស្ដីពីវិធានការមួយនេះ និងបានណែនាំក្រសួងកសិកម្ម ក្រសួងមហាផ្ទៃ និងអាជ្ញាធរពាក់ព័ន្ធផ្សេងទៀតអនុវត្តភារកិច្ចនេះឲ្យបានជោគជ័យ។

(រូបភាព៖ ក្រសួងកសិកម្ម)

បើតាមសារាចរ រាជរដ្ឋាភិបាលតម្រូវឲ្យក្រសួងកសិកម្មចាត់ចែងទប់ស្កាត់ការរីករាលដាលជំងឺប៉េស្តជ្រូកអាហ្វ្រិក និងផ្សព្វផ្សាយដល់ប្រជាពលរដ្ឋឲ្យបានយល់ដឹងពីជំងឺនេះ និងវិធានការការពារ។

ក្រៅពីនេះក្រសួងកសិកម្មក៏ត្រូវឃាត់ទុក និងបំផ្លាញចោលនូវជ្រូក សាច់ជ្រូក ផលិតផលដើមកំណើតពីសាច់ជ្រូកដែលនាំចូលដោយខុសច្បាប់។ សម្រាប់ការនាំចូលត្រូវមានការត្រូតពិនិត្យអនាម័យ និងសុខភាពសត្វតាមលក្ខណៈបច្ចេកទេស និងមានលិខិតអនុញ្ញាតពីក្រសួងកសិកម្ម។

សម្រាប់ក្រសួងមហាផ្ទៃវិញត្រូវដាក់បទបញ្ជាទៅកាន់ អភិបាល រាជធានីខេត្តឲ្យទប់ស្កាត់យ៉ាងម៉ឺងម៉ាត់នូវការនាំចូលដោយខុសច្បាប់ និងគ្មានលិខិតអនុញ្ញាតនូវជ្រូក សាច់ជ្រូក និងផលិតផលមានដើមកំណើតពីសាច់ជ្រូកនៅតាមមាត់ច្រកនានា។

ដើម្បីសម្រេចកិច្ចការនេះដោយជោគជ័យ រាជរដ្ឋាភិបាលតម្រូវឲ្យស្ថាប័នពាក់ព័ន្ធទាំងអស់ត្រូវផ្ដល់កិច្ចសហការដល់ក្រសួងកសិកម្ម។

គួរបញ្ជាក់ថាបច្ចុប្បន្នជំងឺប៉េស្តជ្រូកអាហ្វ្រិកបានឆ្លងដល់ខេត្តរតនគិរី ត្បូងឃ្មុំ តាកែវ កណ្ដាល និងស្វាយរៀង៕