អគារកម្ពស់ ៣៥ជាន់នៅខេត្តព្រះសីហនុ ត្រូវបានបើកការដ្ឋានសាងសង់ជាផ្លូវការ

2019-08-01 02:13:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគារ Morgan The Pure Bay កម្ពស់ ៣៥ជាន់ (ជាង ១២៦ម៉ែត្រ) នៅខេត្តព្រះសីហនុ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី៣១ កក្កដា ឆ្នាំ២០១៩ ក្រោមអធិបតីភាពលោក ជា សុផារ៉ា ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងមានការចូលរួមពីលោក គួច ចំរើន អភិបាលខេត្តព្រះសីហនុ។

រូបថត៖ ក្រសួងដែនដី

អគារពហុមុខងារនេះ វិនិយោគដោយក្រុមហ៊ុនEven Asend Development Co.Ltd ស្ថិតនៅឆ្នេរអូឈើទាល ក្រុងព្រះសីហនុ លើផ្ទៃដីជាង ៣ហិកតា។

រូបថត៖ រដ្ឋបាលខេត្តព្រះសីហនុ

លោក គួច ចំរើន បានថ្លែងថា ពិធីបើកការដ្ឋានសាងសង់អាគារ Morgan The Pure Bay គឺជាការរួមចំណែកយ៉ាងធំធេងក្នុងការអភិវឌ្ឍសេដ្ឋកិច្ចកម្ពុជា ដែលផ្តល់ការងារយ៉ាងច្រើន ដល់ប្រជាពលរដ្ឋកម្ពុជាជាពិសេសប្រជាពលរដ្ឋនៅក្នុងខេត្តព្រះសីហនុ ទទួលបាននូវការកាត់បន្ថយនូវភាពក្រីក្រ ស្របតាមកម្មវិធីនយោបាយរបស់រាជរដ្ឋាភិបាល។

លោក ជា សុផារ៉ា បានលើកឡើងថា គម្រោងសាងសង់អគារពហុបំណងនេះ ពិតជាបានចូលរួមចំណែកបន្ថែមទៀត ក្នុងការជំរុញកំណើនសេដ្ឋកិច្ចជាតិ ក៏ដូចជាការចូលរួមអភិវឌ្ឍន៍លើវិស័យអចលនទ្រព្យនៅព្រះរាជាណាចក្រកម្ពុជា បានផ្តល់ការងារជូនយុវជនដោយមិនចាំបាច់ធ្វើចំណាកស្រុក។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា នៅទូទាំងប្រទេសចាប់ពីឆ្នាំ២០០០ មកដល់ខែមិថុនា ឆ្នាំ២០១៩ ក្រសួងបានចេញលិខិតអនុញ្ញាត សាងសង់ចំនួន ៤ម៉ឺន ៥ពាន់ ៦០៥គម្រោង ដែលមានផ្ទៃក្រឡាសរុបជាង ១២០,៤លានម៉ែត្រក្រឡា និងប៉ាន់ស្មានទុនវិនិយោគសរុបប្រមាណជាង ៤៥ពាន់លានដុល្លារ។ គម្រោងសំណង់អគារដែលមានកម្ពស់ចាប់ពី ៥ជាន់ឡើងមាន ១ពាន់ ៣៥៧អគារ ក្នុងនោះពី៥ ដល់៩ជាន់ មាន៧៤៦ អគារ, ពី១០ ដល់ ១៩ជាន់ មាន៣៧៥អគារ, ពី២០ ដល់ ២៩ជាន់ មាន១២៥អគារ, ពី៣០ ដល់៣៩ មាន ៨០អគារ និងពី៤០ជាន់ឡើងមាន៣១អគារ៕

អត្ថបទ៖ សោភា