ឯកអគ្គរាជទូតជប៉ុន៖ ជប៉ុនបន្តជួយគាំទ្រកម្ពុជានៅលើវិថីប្រជាធិបតេយ្យ

2019-08-15 01:31:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហ៊ីដេហ៊ីសា អូរីណូអ៊ូជី (Hidehisa Hironouchi) ឯកអគ្គរាជទូតជប៉ុន ដែលត្រូវចប់បេសកកម្មការទូតនៅកម្ពុជា បានបញ្ជាក់ថា ជប៉ុនក៏បានជួយបន្តគាំទ្រកម្ពុជានៅលើវិថីប្រជាធិបតេយ្យ ហើយជប៉ុនតាមរយៈនាយករដ្ឋមន្ត្រីជប៉ុន ក៏បានប្រកាសថា នឹងបន្តគាំទ្រដំណើរលទ្ធិប្រជាធិបតេយ្យនៅកម្ពុជា បន្តអញ្ជើញនយោបាយវ័យក្មេងកម្ពុជា ដើម្បីទៅរៀនសូត្រនៅប្រទេសជប៉ុន ស្វែងយល់លទ្ធិប្រជាធិបតេយ្យនៅប្រទេសជប៉ុន។

ការបញ្ជាក់ខាងលើនេះ បានធ្វើឡើងនៅក្នុងជំនួបជម្រាបលាជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កាលពីរសៀលថ្ងៃទី១៤ ខែសីហា ឆ្នា២០១៩ នៅទីស្តីការក្រសួងការបរទេស។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កេត សោផាន់ បានថ្លែងប្រាប់អ្នកកាសែតបន្ទាប់ពីជំនួបចប់ថា លោកឧបនាយករដ្ឋមន្ត្រី ប្រាក់ សុខុន បានសម្តែងនូវការអបអរសាទរ និងរីករាយនូវការបញ្ចប់ដោយជោគជ័យនូវបេសកកម្មការទូត របស់ឯកអគ្គរាជទូតជប៉ុននៅកម្ពុជា និងបានថ្លែងនូវការកោតសរសើរចំពោះការខិតខំប្រឹងប្រែង ការរួមចំណែកពង្រឹងនូវទំនាក់ទំនង មិត្តភាព និងកិច្ចសហប្រតិបត្តិការប្រទេសទាំងពីរ ។ ហើយនៅក្នុងរយៈពេល ៣ឆ្នាំកន្លងមកនេះ លោក ប្រាក់សុខុន និងលោកអគ្គរាជទូតជប៉ុន កត់សម្គាល់ឃើញថាទំនាក់ទំនងទ្វេភាគី នៃប្រទេសទាំងពីរគឺនៅតែបន្តរីកចម្រើនយ៉ាងខ្លាំង។

លោកឧបនាយករដ្ឋមន្ត្រី ក៏បានថ្លែងអំណរគុណដល់រាជរដ្ឋាភិបាលនិងប្រជាជនជប៉ុន ដែលបានរួមចំណែកនិងផ្ដល់ជំនួយ និងគាំទ្រ បងការអភិវឌ្ឍសេដ្ឋកិច្ចនិងសង្គមដល់កម្ពុជា ដែលបានរួមចំណែកឱ្យកម្ពុជាមានកំណើន សេដ្ឋកិច្ចក្នុងរង្វង់ ៧ភាគរយ។

លោក ប្រាក់ សុខុន ក៏បានជម្រាបទៅលោកអគ្គរាជទូតជប៉ុនថា ព្រះករុណាព្រះបាទសម្ដេចព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជា ព្រះអង្គបានសម្រេចព្រះរាជហឫទ័យ នឹងយាងចូលរួមពិធីក្នុងរាជ្យរបស់អធិរាជជប៉ុន នៅក្នុងខែតុលា ឆ្នាំ២០១៩ ខាងមុខនេះ៕

អត្ថបទ៖ សោភា