លោក ហ៊ុន ម៉ាណែត៖ ការថែរក្សាសុខសន្តិភាព គឺអាស្រ័យលើកត្តា២សំខាន់

2019-08-18 03:24:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហ៊ុន ម៉ាណែត បានបញ្ជាក់ថា ការថែរក្សាសុខសន្តិភាព គឺអាស្រ័យលើកត្តា២សំខាន់គឺ៖

ទី១. កត្តាអ្នកដឹកនាំដែលដឹកនាំប្រទេសដោយគោលការណ៍សាមគ្គីបង្រួបបង្រួមជាតិ មិនលាបពណ៌គ្នាឲ្យវាយគ្នា ឈ្លោះគ្នានោះទេ។

ទី២. គឺកត្តាប្រជាពលរដ្ឋដែលចូលរួមនៅក្នុងការថែរក្សាសុខសន្តិភាព បើប្រជាពលរដ្ឋមិនចូលរួម ហើយប្រជាពលរដ្ឋចូលតាមការអូសទាញទៅក្នុងសកម្មភាពអ្វីមួយដែលបំផ្លាញសុខសន្តិភាព នោះក៏អាចបាត់បង់ដែរ។

ការបញ្ជាក់ខាងលើនេះ ក្នុងពិធីបញ្ចុះខណ្ឌសីមា និងសម្ពោធសមិទ្ធផលនានា វត្តពោធិ៍រាជលំពូ ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត កាលពីថ្ងៃទី១៧ ខែសីហា ឆ្នាំ២០១៩។

លោកបន្តថា ការដឹកនាំប្រទេសរបស់រាជរដ្ឋាភិបាលតាំងពីឆ្នាំ១៩៧៩ មកជាខ្មែរតែមួយទោះបីជាមានច្រើនភាគីយ៉ាងណាក៏ដោយ សម្តេច ហ៊ុន សែន មិនគិតថាបក្សណាឬបក្សណានោះទេ គឺរួមគ្នាកសាងប្រទេសឲ្យមានការរីកចម្រើន និងមានសេចក្តីសុខដូចសព្វថ្ងៃនេះ។

លោក ហ៊ុន ម៉ាណែត បានបញ្ជាក់ទៀតថា សម្តេច ហ៊ុន សែន នៅតែមានមហិច្ឆតាក្នុងការធ្វើឲ្យប្រទេសជាតិកាន់តែរីកចម្រើន ធ្វើឲ្យប្រជាពលរដ្ឋកាន់តែមានភាពសម្បូរសប្បាយ និងចង់ឱ្យកូនចៅជំនាន់ក្រោយ កាន់តែសម្បូរសប្បាយ។

«អ្វីដែលជាគោលដៅតទៅមុខទៀត គឺពង្រីកឱកាសការងារ ឱកាសរៀនសូត្រ ឱកាសចិញ្ចឹមជីវភាពដើម្បីឲ្យកាន់តែល្អប្រសើរ។ អ្វីដែលសំខាន់បំផុតគឺសុខសន្តិភាពដែលយើងខិតខំស្វែងរក និងរក្សាឲ្យបានទុកឲ្យកូនចៅជំនាន់ក្រោយកុំឱ្យមានសង្គ្រាមតទៀត។ យើងគ្រប់គ្នាក្នុងទិសដៅតែមួយគឺដើម្បីជួយដល់ប្រជាពលរដ្ឋ យើងរីកចម្រើនតទៅមុខ ថែរក្សាសុខសន្តិភាព កសាងសមិទ្ធផលឲ្យកាន់តែរីកចម្រើន។ ភាពសម្បូរសប្បាយរបស់យើងមាននៅក្នុងសុខសន្តិភាពនៅក្នុងបេះដូង នៅក្នុងអារម្មណ៍របស់យើង ជាមូលដ្ឋាននៅក្នុងការកសាងប្រទេសឲ្យមានការរីកចម្រើន ដែលជាមូលដ្ឋានដែលយើងរាប់អានស្រឡាញ់គ្នា គោរពគ្នាមិនរើសអើង»។ នេះជាការលើកឡើងបន្ថែមរបស់លោក ហ៊ុន ម៉ាណែត៕

អត្ថបទ៖ សោភា