EU នឹងប្រកាសផ្តល់ជំនួយជាង ១០០លានដុល្លារឱ្យកម្ពុជា នៅថ្ងៃពុធខាងមុខនេះ

2019-08-19 06:50:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហភាពអឺរ៉ុប នឹងប្រកាសជួយដល់កម្ពុជា នៅថ្ងៃពុធខាងមុខនេះ នូវទឹកប្រាក់ជាង ១០០លានដុល្លារ សម្រាប់វិស័យជលផល។ នេះបើតាមការបញ្ជាក់របស់លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា ដែលបានចប់អាណត្តិ ក្នុងជំនួបជាមួយសម្តេច ហ៊ុន សែន នៅព្រឹកថ្ងៃទី១៩ ខែសីហា ឆ្នាំ២០១៩។

ជាមួយនឹងការផ្តល់ជំនួយលើវិស័យនេះ សម្តេចបានស្វាគមន៍ ខណៈដែលរាជរដ្ឋាភិបាលកម្ពុជា បានលុបចោលនូវឡូនេសាទ ហើយឱ្យសហគមន៍ប្រជាពលរដ្ឋ ដើម្បីជាផលប្រយោជន៍របស់ប្រជាជនតែម្តង កាលពីឆ្នាំ២០១២ ហើយ EU បានជួយទៅដល់វិស័យមួយនេះ ដែលនឹងជួយដល់ប្រជាពលរដ្ឋកម្ពុជាផងដែរ។

លើសពីនេះទៀត លោកឯកអគ្គរដ្ឋទូត ក៏បានគូសបញ្ជាក់អំពីការជួយទៅដល់វិស័យបម្រែបម្រួលអាកាសធាតុដែលកម្ពុជា ជាប្រទេសមួយនៅតំបន់អាស៊ីអាគ្នេយ៍ដែលងាយរងគ្រោះដោយបម្រែបម្រួលអាកាសធាតុ ដែលនេះក៏ជាបញ្ហាពិភពលោកផងដែរ។ មិនតែប៉ុណ្ណោះ EU នឹងបន្តជួយលើវិស័យព្រៃឈើ ដែលបច្ចុប្បន្នជាការងារអាទិភាពរបស់រាជរដ្ឋាភិបាលកម្ពុជា ក្នុងការប្រឆាំងការកាប់បំផ្លាញព្រៃឈើខុសច្បាប់។ នៅក្នុងនេះដែរ លោកក៏អបអរសាទរលើលទ្ធផលការងារក្នុងវិស័យទាំង២នេះ គឺវិស័យជលផល និងព្រៃឈើនេះ ។ មួយវិញទៀត EU ក៏បានធ្វើវិភាគទានដ៏ថ្លៃថ្លាទៅដល់តុលាការខ្មែរក្រហមដែលជាតុលាការកូនកាត់ ឱ្យមានភាពជោគជ័យកន្លងមកផងដែរ។

ជាការឆ្លើយតប សម្ដេចនាយករដ្ឋមន្ត្រី ក៏បានមានប្រសាសន៍មួយចំនួនពាក់ព័ន្ធនឹងដំណើរការរបស់តុលាការខ្មែរក្រហមដែលនឹងមកដល់ទីបញ្ចប់នៅពេលខាងមុខនេះ ហើយសម្តេចក៏បានអរគុណចំពោះ EU ដែលបានជួយវិភាគទានក្នុងការស្វែងរកយុត្តិធម៌ចំពោះប្រជាពលរដ្ឋកម្ពុជា ជាពិសេសមិនត្រឹមតែប្រជាពលរដ្ឋដែលបាត់បង់អាយុជីវិតប៉ុណ្ណោះទេ ថែមទាំងជួយដល់ប្រជាពលរដ្ឋរងគ្រោះដែលបានឆ្លងកាត់របបប្រល័យពូជសាសន៍នោះថែមទៀតផង៕

អត្ថបទ និងរូបថត៖ ទំព័រហ្វេសប៊ុកសម្តេច ហ៊ុន សែន