ចិននឹងលើកទឹកចិត្តសហគ្រាសល្អៗក្នុងប្រទេសខ្លួនមកវិនិយោគនៅខេត្តព្រះសីហនុ

2019-08-23 03:24:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឯកអគ្គរដ្ឋទូតចិនប្រចាំកម្ពុជាលើកឡើងថារដ្ឋាភិបាលចិននឹងលើកទឹកចិត្តឲ្យហសគ្រាសល្អៗក្នុងប្រទេសចិនមកវិនិយោគក្នុងខេត្តព្រះសីហនុ ខណៈសភាពាណិជ្ជកម្មចិនប្រចាំកម្ពុជាកំពុងមានគម្រោងបើកសាខាសមាគមក្នុងខេត្តមួយនេះដែរ។

(រូបភាព៖ ស្ថានទូតចិនប្រចាំកម្ពុជា)

ឯកអគ្គរដ្ឋទូតចិនប្រចាំកម្ពុជាឯកឧត្តម Wang Wentian កាលពីម្សិលមិញបានជួបជាមួយអភិបាលខេត្តព្រះសីហនុឯកឧត្តម គួច ចំរើន។ នេះបើតាមការផ្សាយរបស់ស្ថានទូតចិនប្រចាំកម្ពុជាលើទំព័រហ្វេសប៊ុករបស់ខ្លួននាព្រឹកនេះ។

ប្រភពបន្តថាជំនួបនេះភាគីទាំងពីរបានផ្លាស់ប្តូរយោបល់គ្នាទៅវិញទៅមកទាក់ទងនឹងកិច្ចសហប្រតិបត្តិការថ្នាក់ក្រោមជាតិ។ ទន្ទឹមនឹងនោះភាគីស្ថានទូតចិនក៏បានបង្ហើបឲ្យដឹងពីគម្រោងរបស់សភាពាណិជ្ជកម្មចិនប្រចាំកម្ពុជាចិនមានបំណងបើកសាខាសមាគមក្នុងខេត្តមួយនេះ។

ប្រភពបន្តថា៖ « សភាពាណិជ្ជកម្មចិនប្រចាំកម្ពុជាកំពុងមានគម្រោងបើកសាខាសមាគមក្នុងខេត្តព្រះសីហនុដើម្បីដើរតួជាស្ពានសម្រាប់ភ្ជាប់សហគ្រាសចិននិងកម្ពុជាបានយ៉ាងងាយស្រួល។ រដ្ឋាភិបាលចិននឹងលើកទឹកចិត្តសហគ្រាសល្អៗជាច្រើនក្នុងប្រទេសចិនមកវិនិយោគមុខរបរក្នុងខេត្តព្រះសីហនុ បន្តគាំទ្រការអភិវឌ្ឍឧស្សាហកម្មកំពង់ផែដែលជាចំនុចសំខាន់ក្នុងតំបន់សេដ្ឋកិច្ចពិសេសនៃខេត្ត ជំរុញសេដ្ឋកិច្ចខេត្តព្រះសីហនុមានការអភិវឌ្ឍកាន់តែល្អប្រសើរ»៕

អត្ថបទ៖ ទូច សុខា