លោក ហ៊ុន ម៉ាណែត ចូលរួមលំហាត់រួមគ្នារវាងកងកម្លាំងកម្ពុជា-វៀតណាម បង្រ្កាបបទល្មើសតាមព្រំដែន
- 2019-08-30 03:06:05
- ចំនួនមតិ 0 | ចំនួនចែករំលែក 0
លោក ហ៊ុន ម៉ាណែត ចូលរួមលំហាត់រួមគ្នារវាងកងកម្លាំងកម្ពុជា-វៀតណាម បង្រ្កាបបទល្មើសតាមព្រំដែន
ចន្លោះមិនឃើញ
លំហាត់រួមគ្នារវាងកងកម្លាំងការពារព្រំដែនកម្ពុជា និងវៀតណាមក្នុងការល្បាត និងបង្រ្កាបបទល្មើសតាមបណ្តាព្រំដែននៃប្រទេសទាំងពីរក្នុងខេត្តតាកែវ និងខេត្តអានយ៉ាង ប្រទេសវៀតណាម នៅច្រកអន្តរជាតិភ្នំឌិន-ទិញបៀន កាលពីថ្ងៃទី២៧-២៨ ខែសីហា ឆ្នាំ២០១៩។
លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានអញ្ជើញចូលរួមក្នុងពិធីធ្វើលំហាត់សមយុទ្ធប្រយុទ្ធប្រឆាំងគ្រឿងញៀនដ៏ធំមួយនៅតាមបណ្ដោយព្រំដែនខេត្តតាកែវ និងខេត្តអានយ៉ាង ប្រទេសវៀតណាម។
ភាគីវៀតណាមដឹកនាំដោយលោក ង្វៀង ជីវិញ អនុរដ្ឋមន្ត្រីការពារជាតិវៀតណាម និងជាមេបញ្ជាការការពារព្រំដែនវៀតណាម។
លំហាត់ប្រយុទ្ធប្រឆាំងគ្រឿងញៀន គឺក្នុងគោលបំណងសំដៅបង្កើនកិច្ចសហប្រតិបត្តិការលើការបង្ក្រាបគ្រឿងញៀនឆ្លងដែនឲ្យកាន់តែមានប្រសិទ្ធភាពថែមទៀត ជាពិសេសរាល់ការចរាចរគ្រឿងញៀននៅតាមបណ្តោយព្រំដែនរវាងកម្ពុជា និងវៀតណាម។
បន្ទាប់ពីធ្វើសមយុទ្ធដោយប្រើកម្លាំងយោធា និងកម្លាំងនគរបាលនៃប្រទេសទាំងពីរ ក៏បានដើរល្បាតនៅតាមបណ្ដោយព្រំដែនរួមគ្នាចម្ងាយប្រមាណ ៤គីឡូម៉ែត្រ។
ថ្នាក់ដឹកនាំក្រសួងការពារជាតិនៃប្រទេសទាំងពីរបានសន្យាថា និងពង្រឹងកិច្ចសហប្រតិបត្តិការនៅតាមបណ្ដោយព្រំដែនឲ្យកាន់តែល្អប្រសើរថែមទៀត ក្រៅពីបង្កើនកិច្ចសហប្រតិបត្តិការទប់ស្កាត់គ្រឿងញៀនឲ្យកាន់តែខ្លាំងក្លា ប្រទេសកម្ពុជា និងវៀតណាម ធ្វើការទប់ស្កាត់រាល់បទល្មើសជួញដូរមនុស្សឆ្លងដែន ការរត់ពន្ធទំនិញខុសច្បាប់ ជាពិសេសធ្វើយ៉ាងណាខិតខំប្រែក្លាយតំបន់ព្រំដែននៃប្រទេសទាំងពីរឲ្យទៅជាព្រំដែនសន្តិភាព៕