សល់តែជាង៣ឆ្នាំទៀត រថភ្លើងល្បឿនលឿនរបស់ថៃ នឹងបើកដំណើរការហើយ

2019-09-04 08:53:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងរថភ្លើងល្បឿនលឿនរវាងថៃ និងចិន ដែលមានចម្ងាយផ្លូវ ៨៧៣គីឡូម៉ែត្រ នឹងត្រូវដាក់ឲ្យប្រើប្រាស់ជាលើកដំបូងនៅឆ្នាំ២០២៣ខាងមុខ។ យ៉ាងណាមិញ ជាជំហានដំបូង ថៃនឹងបើកឲ្យដំណើរការផ្នែកទី១សិន ដែលមានចម្ងាយ ២៥២គីឡូម៉ែត្រ ដោយតភ្ជាប់ពីទីក្រុងបាងកក ទៅកាន់ទីក្រុង Nakhon Ratchasima ស្ថិតនៅភាគឦសានប្រទេស។ រថភ្លើងនេះមានល្បឿនអតិបរមា ២៥០គីឡូម៉ែត្រក្នុង១ម៉ោង។ នេះបើយោងតាមការចុះផ្សាយរបស់សារព័ត៌មាន The Thaiger នៅថ្ងៃទី៤ ខែកញ្ញា ឆ្នាំ២០១៩។

រូបតំណាង

ប្រភពដដែល បានបញ្ជាក់ទៀតថា សម្រាប់ផ្នែកទី២វិញ វានឹងតភ្ជាប់ពីទីក្រុង Nakhon Ratchasima ទៅកាន់ខេត្ត Nong Khai ដែលនៅជាប់ព្រំដែនឡាវ។ បន្ទាប់មកគឺភ្ជាប់ពីឡាវទៅកាន់ចិនតែម្ដង។ ទោះជាយ៉ាងនេះក្ដី កាលបរិច្ឆេទនៃការបើកដំណើរការនៅមិនទាន់មានការបញ្ជាក់ច្បាស់នោះទេ។

ថវិកាដែលថៃត្រូវចំណាយលើគម្រោងរថភ្លើងល្បឿនលឿននេះមានចំនួនសរុប ១៧៩ពាន់លានបាត ឬស្មើនឹងជាង ៥,៨ពាន់លានដុល្លារអាមេរិក។ ភាគីចិននឹងជួយថៃទៅលើផ្នែករចនាបថ ព្រមទាំងការផ្គត់ផ្គង់រថភ្លើង ក៏ដូចជាទូរថភ្លើងជាដើម។ ការបង្កើតឡើងនេះគឺជាផ្នែកមួយនៃគម្រោងផ្លូវរថភ្លើងល្បឿនលឿនរបស់ចិន ដើម្បីឆ្លងកាត់អាស៊ីអាគ្នេយ៍ ដែលនឹងតភ្ជាប់ទីក្រុង Kunming របស់ចិន ទៅកាន់ប្រទេសសិង្ហបុរី។

ក្រុមហ៊ុនផ្លូវដែករដ្ឋស្ដីទីនៃប្រទេសថៃ បានប្រកាសកាលពីថ្ងៃទី៣កញ្ញាថា កិច្ចសន្យាខាងលើកំពុងស្ថិតនៅក្នុងការត្រួតពិនិត្យជំហានបញ្ចប់ ហើយនឹងត្រូវចុះហត្ថលេខាមុនដំណាច់ឆ្នាំ២០១៩។ គម្រោងនេះធ្លាប់បានពន្យារពេលម្ដងរួចមកហើយកាលពីឆ្នាំ២០១៦ នៅពេលដែលថៃបានបដិសេធហិរញ្ញប្បទានរបស់ចិន ដោយលើកឡើងពីអត្រាការប្រាក់ខ្ពស់នៅក្នុងកិច្ចសន្យាដើម។

ក្នុងកិច្ចសន្យាថ្មីនេះ ថៃក៏កំពុងស្នើឲ្យមានការតភ្ជាប់ផ្លូវរថភ្លើងល្បឿនលឿនផងដែររវាងព្រលានយន្តហោះសុវណ្ណភូមិ ព្រលានយន្តហោះ Don Mueang និងព្រលានយន្តហោះ U-Tapao៕

ប្រភព៖ The Thaiger ប្រែសម្រួល៖ ឈាង