ក្រសួង នឹងចាត់វិធានការចំពោះជនរៀបចំឡូតិ៍តំបន់អភិវឌ្ឍន៍ ឡង វុទ្ធី
- 2019-09-18 01:00:00
- ចំនួនមតិ 0 | ចំនួនចែករំលែក 0
ក្រសួង នឹងចាត់វិធានការចំពោះជនរៀបចំឡូតិ៍តំបន់អភិវឌ្ឍន៍ ឡង វុទ្ធី
ចន្លោះមិនឃើញ
ក្រសួងបរិស្ថាន បានឲ្យដឹងថា កន្លងមក មានការប្រកាសផ្សព្វផ្សាយការរៀបចំដីឡូតិ៍តំបន់អភិវឌ្ឍន៍ ឡុង វុទ្ធី ដែលមានទំហំផ្ទៃដី ៤៩,៦០០ ម៉ែត្រការ៉េ មានទីតាំងនៅក្នុងភូមិភ្នំដំបង ឃុំសន្តិភាព ស្រុកសំឡូត ខេត្តបាត់ដំបង ជាតំបន់ស្ថិតនៅក្នុងតំបន់ការពារធម្មជាតិ (តំបន់ប្រើប្រាស់ច្រើនយ៉ាងសំឡូត) ដែលបានកំណត់ដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣។
យោងតាមច្បាប់ស្ដីពីតំបន់ការពារធម្មជាតិ ដីតំបន់ការពារធម្មជាតិ គឺជាដីសាធារណៈរបស់រដ្ឋ ដែលមិនអនុញ្ញាតឱ្យកាប់រាន ទន្ទ្រានកាន់កាប់ លក់ដូរបានឡើយ និងមិនអាចស្ថិតនៅក្រោមការកាន់កាប់ដោយលទ្ធកម្មពិសេសនៃភោគៈឡើយ។ ការចាត់ចែងលក់ដូរដី សា ធារ ណៈ របស់រដ្ឋនៃតំបន់ការពារធម្មជាតិ គឺជាបទល្មើសព្រហ្មទណ្ឌ ដោយអ្នកប្រព្រឹត្ត និងអ្នកជាប់ពាក់ព័ន្ធត្រូវផ្តន្ទាទោសជាប់ពន្ធនាគារ និងត្រូវបានចាត់ចូលជាឧក្រិដ្ឋកម្ម ដូចមានចែងក្នុងច្បាប់ស្តីពីការប្រឆាំងសម្អាតប្រាក់ និងហិរញ្ញប្បទានភេរវកម្ម។
ក្រសួងបានបន្តថា ដើម្បីជៀសវាងហានិភ័យជាយថាហេតុដែលបង្កឡើងដោយជនខិលខូច មុននឹងធ្វើការសម្រេចចិត្តទិញដីឡូត៍ខាងលើនេះ សូមសាធារណជនមេត្តាយល់ដឹងនូវព័ត៌មានសំខាន់ៗ មួយចំនួនដូចខាងក្រោម៖
១. ឈ្មោះម្ចាស់អចលនទ្រព្យក្នុងវិញ្ញាបនប័ត្រសម្គាល់ម្ចាស់អចលនទ្រព្យ (តើជារបស់អ្នកអភិវឌ្ឍគម្រោងពុះដីឡូតិ៍លក់ ឫជារបស់អ្នកផ្សេង)
២. វិញ្ញាបនប័ត្រសម្គាល់ម្ចាស់អចលនទ្រព្យ (មានជាប់បន្ទុក ឫអត់)
៣. លិខិតអនុញ្ញាតអភិវឌ្ឍដីដែលចេញដោយអាជ្ញាធរ ឬអង្គភាពមានសមត្ថកិច្ច (ដូចមានចែងក្នុង ប្រកាសលេខ០៨៧ ដ.ន.ស ប្រក/នីក. ចុះថ្ងៃទី១១ ខែឧសភា ឆ្នាំ២០១៨ ស្តីពីការអភិវឌ្ឍដីរបស់ក្រសួងរៀបចំដែនដី នគរូបនីយកម្ម និងសំណង់។
៤. ឯកសារបង់ពន្ធអចលនវត្ថុ
៥. បណ្ណបំបែកក្បាលដី
៦. ខ្លឹមសារលម្អិតនៃកិច្ចសន្យាលក់-ទិញ។
ក្នុងន័យនេះ ក្រសួងបរិស្ថាន និងរដ្ឋបាលសាលាខេត្តបាត់ដំបង កំពុងចាត់វិធានការ ចំពោះជនរៀបចំឡូតិ៍តំបន់អភិវឌ្ឍ ឡង វុទ្ធី ទំហំផ្ទៃដីសរុប ៤៩,៦០០ម៉ែត្រការ៉េ តាមបញ្ញត្តិច្បាប់នៃព្រះរាជាណាចក្រកម្ពុជា ជាធរមាន និងអំពាវនាវ ដល់សាធារណជនកុំចូលរួមទិញ ឬទទួលយកចំណែកដីឡូត៍ខាងលើនេះជាដាច់ខាត៕