សម្តេច ស ខេង៖ បុគ្គលនិងសារព័ត៌មានមួយចំនួន បំភ្លើសថា ខ្ញុំរារាំងពលរដ្ឋមិនឱ្យទៅធ្វើបុណ្យ
- 2019-09-18 02:27:33
- ចំនួនមតិ 0 | ចំនួនចែករំលែក 0
សម្តេច ស ខេង៖ បុគ្គលនិងសារព័ត៌មានមួយចំនួន បំភ្លើសថា ខ្ញុំរារាំងពលរដ្ឋមិនឱ្យទៅធ្វើបុណ្យ
ចន្លោះមិនឃើញ
សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានឱ្យដឹងថា មានបុគ្គល និងសារព័ត៌មានមួយចំនួន បានបំភ្លើសថា សម្តេចបានរារាំងប្រជាពលរដ្ឋក្នុងការធ្វើបុណ្យទាន អំឡុងបុណ្យភ្ជុំបិណ្ឌនេះ។
នៅលើទំព័រហ្វេសប៊ុកសម្តេចក្រឡាហោមដែលបង្ហោះនាព្រឹកថ្ងៃទី១៨ ខែកញ្ញា ឆ្នាំ២០១៩ បានសរសេរយ៉ាងដូច្នេះថា៖
«កាលពីថ្ងៃទី១០ ខែកញ្ញា ឆ្នាំ២០១៩ ខ្ញុំព្រះករុណាខ្ញុំបានផ្ញើសារសំឡេង ទៅអភិបាលរាជធានីខេត្ត ណែនាំឲ្យខិតខំ និងគ្រប់គ្រងសភាពការណ៍ សន្តិសុខសណ្ដាប់ធ្នាប់សាធារណៈ ក្នុងឱកាសដែលប្រជាពលរដ្ឋទូទាំងប្រទេស កំពុងប្រារព្ធពិធីបុណ្យកាន់បិណ្ឌ និងបុណ្យភ្ជុំបិណ្ឌ ដោយមិនបានបញ្ជាឲ្យរារាំង ឬគៀបសង្កត់ប្រជាពលរដ្ឋណាម្នាក់មិនឲ្យចូលរួមប្រារព្ធពិធីបុណ្យនេះឡើយ។ ប៉ុន្តែមានបុគ្គល និងសារព័ត៌មានមួយចំនួនដែលមាននិន្នាការប្រឆាំង បានយកទៅធ្វើអាជីវកម្ម បកស្រាយបំភ្លើស និងមួលបង្កាច់ក្នុងន័យថាខ្ញុំព្រះករុណា បានរារាំង ឬគៀបសង្កត់ប្រជាពលរដ្ឋក្នុងការធ្វើបុណ្យទៅតាមប្រពៃណីព្រះពុទ្ធសាសនាទៅវិញ។ នេះជាចេតនាអាក្រក់ដែលខ្ញុំព្រះករុណាខ្ញុំមិនទទួលយកបានឡើយ។ ក្នុងនាមជាអ្នកទទួលខុសត្រូវសន្តិសុខសណ្ដាប់ធ្នាប់សាធារណៈសម្រាប់ប្រទេសជាតិខ្ញុំព្រះករុណាខ្ញុំមានសិទ្ធិ និងកាតព្វកិច្ចតាមផ្លូវច្បាប់ក្នុងការដាក់ចេញបទបញ្ជា ដើម្បីថែរក្សាសន្តិសុខសណ្ដាប់ធ្នាប់សាធារណៈសម្រាប់គ្រប់ព្រឹត្តិការណ៍នានា»។
ជាមួយគ្នានេះ សម្តេច ស ខេង បន្ថែមថា សម្តេចមានសិទ្ធិចេញបញ្ជាឱ្យមន្ត្រីក្រោមឱវាទក្នុងការគ្រប់គ្រងសភាពការណ៍ ហើយសកម្មភាពទាំងឡាយណាដែលប៉ុនប៉ងបំផ្លាញសុខសន្តិភាព ស្ថិរភាពនយោបាយ បំផុសឲ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល៕