អាជ្ញាធរចាត់វិធានការបែបនេះ បរិវេណប្រាសាទអង្គរវត្តនឹងកាន់តែស្រស់ស្អាត

2019-10-02 06:37:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរជាតិអប្សរា នឹងចាត់វិធានការបញ្ឈប់សកម្មភាពលក់ដូរ ក្រាលកន្ទេល ដាក់អង្រឹង បើកគ្រឿងបំពងសំឡេងខ្លាំងៗ និងសម្ភារៈផ្សេងៗ នៅជុំវិញកសិន្ធុប្រាសាទអង្គរវត្ត ដើម្បីលើកកម្ពស់បរិស្ថានស្អាត សោភ័ណភាពស្រស់បំព្រង ក៏ដូចជាលើកតម្លៃទីសក្ការៈដ៏ឧត្តុង្គឧត្តមនៃរមណីយដ្ឋានអង្គរ អាជ្ញាធរជាតិអប្សរា អង្គភាពនគរបាលពាក់ព័ន្ធ និងអាជ្ញាធរមូលដ្ឋានបានបង្កើតក្រុមការងារចម្រុះធ្វើការអប់រំណែនាំផ្ទាល់នៅទីកន្លែងចាប់ពីថ្ងៃ០២ រហូតដល់ថ្ងៃទី០៧ ខែតុលា ឆ្នាំ២០១៩។

ទីតាំងដែលក្រុមការងារចម្រុះអនុវត្តការងាររបស់ខ្លួនមានដូចជា ជុំវិញបរិវេណត្រពាំងសេស ប្រាសាទព្រហ្មកិល និងតាមដងផ្លូវកៅស៊ូនៃកសិន្ធុប្រាសាទអង្គរវត្ត។ ក្នុងករណីហួសកាលបរិច្ឆេទអប់រំណែនាំ ហើយសកម្មភាពលក់ដូរ ក្រាលកន្ទេល ដាក់អង្រឹង បើកគ្រឿងបំពងសំឡេងខ្លាំងៗ និងសម្ភារៈផ្សេងនៅតែបន្តមាននោះ ក្រុមការងារចម្រុះនឹងអនុវត្តវិធានការរដ្ឋបាលចាំបាច់នានាទៅលើអ្នកប្រព្រឹត្តិល្មើសនឹងច្បាប់ទាំងនោះ។

អាជ្ញាធរជាតិអប្សរា ក៏បានអំពាវនាវឱ្យមានការចូលរួមសហការបញ្ឈប់សកម្មភាពលក់ដូរ ក្រាលកន្ទេល ដាក់អង្រឹង បើកគ្រឿងបំពងសំឡេងខ្លាំងៗ និងការដាក់សម្ភារៈផ្សេងៗ នៅលើវាលស្មៅជុំវិញកសិន្ធុប្រាសាទអង្គរវត្តឱ្យបានជាដាច់ខាតចាប់ពីពេលនេះតទៅ៕