រដ្ឋមន្រ្តីក្រសួងពាណិជ្ជកម្មជប៉ុន ទទួលស្គាល់កំហុស ហើយសុំលាលែងចេញពីតំណែង
- 2019-10-25 03:13:20
- ចំនួនមតិ 0 | ចំនួនចែករំលែក 0
រដ្ឋមន្រ្តីក្រសួងពាណិជ្ជកម្មជប៉ុន ទទួលស្គាល់កំហុស ហើយសុំលាលែងចេញពីតំណែង
ចន្លោះមិនឃើញ
រដ្ឋមន្រ្តីក្រសួងពាណិជ្ជកម្មជប៉ុន លោក Isshu Sugawar ដែលទើបតែចូលកាន់តំណែងបាន១ខែ បានសុំលាលែងពីតំណែងនេះវិញ ដោយលោកបានរងការចោទថា បានបំពានច្បាប់យុទ្ធនាការឃោសនាបោះឆ្នោត។ លិខិតសុំលាលែង ត្រូវបានលោក Isshu Sugawar ផ្ញើទៅនាយករដ្ឋមន្រ្តីជប៉ុន លោក ស៊ិនហ្សូ អាបេ នាព្រឹកថ្ងៃទី២៥ ខែតុលា ឆ្នាំ២០១៩។
ការសម្រេចនេះ ធ្វើឡើងបន្ទាប់ពីទស្សនាវដ្តី Shukan Bunshun បានផ្សព្វផ្សាយព័ត៌មានកាលពីថ្ងៃទី២៤ ខែតុលាថា រដ្ឋលេខាធិការម្នាក់ បានយកថវិកា ២ម៉ឺនយ៉េន (ជាង ១៨៤ដុល្លារ) ក្រោមឈ្មោះលោក Isshu Sugawar ទៅចូលបច្ច័យក្នុងពិធីបុណ្យសពរបស់អ្នកគាំទ្រលោកម្នាក់ដែលទទួលមរណភាព នៅតំបន់ Nerima Ward ក្រុងតូក្យូ ដែលនេះត្រូវគេចោទថា ជាការទិញទឹកចិត្តពលរដ្ឋ។
លោកបានថ្លែងក្នុងសន្និសីទកាសែតយ៉ាងដូច្នេះថា៖ «ខ្ញុំមានអារម្មណ៍អៀនខ្មាស់យ៉ាងខ្លាំង ក្នុងការលាលែងពីតំណែងនេះ ដោយសារតែបញ្ហាជាច្រើន។ ខ្ញុំសុំទោស»។
ចំណែកលោកនាយករដ្ឋមន្រ្តីជប៉ុនវិញ ក៏បានបង្ហាញការសោកស្តាយ និងទទួលខុសត្រូវលើរឿងនេះផងដែរ ដោយសារតែលោកជាអ្នកតែងតាំងរដ្ឋមន្រ្តីខាងលើ។ លោកបន្ថែមថា តំណែងលោក Sugawar នឹងត្រូវជំនួសដោយលោក Hiroshi Kajiyama ដែលអតីតរដ្ឋមន្រ្តីក្រសួងមួយរូបផងដែរ៕