លោក ប្រាក់ សុខុន ជួបទូតទីម័រខាងកើត ពិភាក្សាពីអ្វីខ្លះ?

2019-12-30 06:15:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានទទួលជួបលោកស្រី Felicidade de Sousa Guterres ឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រឡេស្តេប្រចាំកម្ពុជា ជម្រាបលានៅទីស្តីការក្រសួងការបរទេស នៅថ្ងៃទី៣០ ខែធ្នូ ឆ្នាំ២០១៩។

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងប្រាប់ក្រុមអ្នកកាសែតថា លោកឧបនាយករដ្ឋមន្ត្រី ប្រាក់ សុខុន បានសម្តែងនូវការអបអរសាទរ និងវាយតម្លៃខ្ពស់ចំពោះភាពជោគជ័យ នៃបេសកកម្មការទូតរបស់លោកស្រី Felicidade de Sousa Guterres ក្នុងរយៈពេល ៤ឆ្នាំនៅកម្ពុជា ដែលបានខិតខំធ្វើឲ្យទំនាក់ទំនងរវាងកម្ពុជា និងសាធារណរដ្ឋប្រជាធិបតេយ្យទីម័រឡេស្តេ មានការរីកចំរើនគួរឲ្យកត់សម្គាល់។ ហើយកន្លងមកប្រទេសទាំងពីរតែងតែគោរពគ្នា និងគាំទ្រគ្នាទៅវិញទៅមក។ ហើយកិច្ចសហប្រតិបត្តិការល្អប្រសើរនេះគឺតាមរយៈការផ្លាស់ប្តូរនៅទស្សកិច្ច នៃថ្នាក់ដឹកនាំប្រទេសទាំងពីរជាច្រើនលើក។

លោក ប្រាក់ សុខុន ឧបនាយករដ្ឋមន្ត្រីក៏បានកោតសរសើរចំពោះកិច្ចខិតខំប្រឹងប្រែងរបស់លោកស្រី Felicidade de Sousa Guterres ដែលបានធ្វើឲ្យប្រទេសទាំងពីរមានទំនាក់ទំនងកាន់តែល្អ។ ហើយថ្នាក់ដឹកនាំរាជរដ្ឋាភិបាលកម្ពុជា ជាពិសេសថ្នាក់ដឹកនាំក្រសួងការបរទេស គឺត្រៀមសហការជាមួយឯកអគ្គរដ្ឋទូតថ្មីនៃសាធារណរដ្ឋប្រជាធិបតេយ្យទីម័រឡេស្តេប្រចាំកម្ពុជាឲ្យមានទំនាក់ទំនងកាន់តែរឹងមាំថែមទៀត។

ជាការឆ្លើយតបលោកស្រី Felicidade de Sousa Guterres បានថ្លែងអំណរគុណដល់រដ្ឋាភិបាលកម្ពុជា ជាពិសេសតាមរយៈក្រសួងការបរទេសដែលមានកិច្ចសហការល្អជាមួយលោកស្រី ដែលបានធ្វើឲ្យបេសកកម្មរបស់លោកស្រីចប់ដោយបរិបូរប្រកបដោយជោគជ័យ។ នៅក្នុងបេសកម្មរបស់លោកស្រី ភាគីទាំងពីរបានពិនិត្យទៅលើវិស័យដើម្បីកិច្ចសហប្រតិបត្តិការរវាងប្រទេសទាំងពីរ។ ដោយលោកស្រីបានមើលឃើញវិស័យអាទិភាព គឺវិស័យទេសចរណ៍ កសិកម្ម។ លោកស្រីក៏បានអរគុណរដ្ឋាភិបាលកម្ពុជាផងដែរ ដែលបានផ្តល់អាហារូបករណ៍ដល់និស្សិតទីម័រឡេស្តេចំនួន ១០រូបមករៀននៅកម្ពុជា។

លោកស្រីបានបញ្ជាក់ថា កម្ពុជាគឺជាប្រទេសដែលទីម័រឡេស្តេយកធ្វើជាគំរូ និងរៀនសូត្រតាម ដើម្បីធ្វើការអភិវឌ្ឍប្រទេសទីម័រឡេស្តេ។ លោកស្រី អរគុណកម្ពុជាដែលតែងតែគាំទ្រទីម័រឡេស្តេ ដែលទីម័រឡេស្តេមានបំណងចូលជាសមាជិកទី១១ នៃប្រទេសអាស៊ាន។ ហើយកម្ពុជាមិនត្រឹមតែគាំទ្រទីម័រឡេស្តេ មិនត្រឹមតែកម្រិតតំបន់ទេ គឺក្នុងកម្រិតអន្តរជាតិផងដែរ៕

អត្ថបទ៖ កុសល