ផ្ទុះវីរុសផ្ដាសាយបក្សី H5N1 នៅខេត្ត Hunan ប្រទេសចិន

2020-02-02 01:38:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជំងឺផ្ដាសាយបក្សីដ៏គ្រោះថ្នាក់ H5N1 បានផ្ទុះឡើងជាថ្មី នៅកសិដ្ឋានមួយកន្លែង ក្នុងក្រុង Shaoyang ភាគខាងត្បូង នៃខេត្ត Hunan ប្រទេសចិន។ នេះបើយោងតាមការក្រសួងកសិកម្ម និងកិច្ចការជនបទចិន ប្រកាសកាលពីថ្ងៃសៅរ៍ម្សិលមិញ។

ករណីនេះ បានកើងឡើងនៅកសិដ្ឋានមួយ ដែលមានមាន់ ៧៨៥០ក្បាល ដែលក្នុងនោះ ៤៥០០ក្បាល បានស្លាប់ដោយសារផ្ដាសាយបក្សី។

មាន់ក្នុងកសិដ្ឋានមួយកន្លែង (រូបតំណាង)

អាជ្ញាធរ បានសម្លាប់បក្សីជាច្រើនម៉ឺនក្បាល ដើម្បីទប់ស្កាត់ការរីករាលដាលនេះ។ យ៉ាងណាក្ដី ចិនមិនមែនជាប្រទេសតែមួយ ដែលផ្ទុះផ្ដាសាយបក្សីជាថ្មីនោះទេ។ កាលពីដើមសប្ដាហ៍កន្លងទៅ អាជ្ញាធរឥណ្ឌា បានចាប់ផ្ដើមសម្លាប់បក្សី និងស៊ុតជាច្រើន ដែលមានផ្ទុកវីរុសដូចគ្នានេះ។ ចំណែកនៅអឺរ៉ុបខាងកើត មានវីរុសស្រដៀងគ្នានេះ គឺ H5N8 ផ្ទុះឡើងផងដែរ កាលពីប៉ុន្មានសប្ដាហ៍មុន។

គួររំលឹកផងដែរថា ផ្ដាសាយបក្សី បានផ្ទុះឡើងកាលពីឆ្នាំ២០១៣ ដែលបានធ្វើឲ្យខូចខាតសេដ្ឋកិច្ចប្រមាណ ៦,៥ពាន់លានដុល្លារ។ ការផ្ទុះឡើងជាថ្មីនេះ គឺនៅចំពេលដែលចិន កំពុងរងការរីករាលដាលនៃវីរុសកូរ៉ូណា ដែលបានសម្លាប់ជីវិតមនុស្សជាង ៣០០នាក់ហើយ គិតត្រឹមថ្ងៃទី២ ខែកុម្ភៈនេះ៕

អត្ថបទ៖ ឈិន មិថុនា