ក្រសួងឆ្លើយតបរឿងដែលម៉ាឡេស៊ីរកឃើញកូរ៉ូណាលើជនជាតិអាមេរិកក្រោយចាកចេញពីកម្ពុជា
- 2020-02-15 23:36:15
- ចំនួនមតិ 0 | ចំនួនចែករំលែក 0
ក្រសួងឆ្លើយតបរឿងដែលម៉ាឡេស៊ីរកឃើញកូរ៉ូណាលើជនជាតិអាមេរិកក្រោយចាកចេញពីកម្ពុជា
ចន្លោះមិនឃើញ
ក្រសួងសុខាភិបាលបានចេញសេចក្តីប្រកាសព័ត៌មានភ្លាមៗកាលពីយប់មិញ បន្ទាប់ពីមានការផ្សព្វផ្សាយថា អាជ្ញាធរម៉ាឡេស៊ីបានពិនិត្យឃើញមានករណីវីរុសកូរ៉ូណាថ្មី COVID-19 កើតឡើងទៅលើស្រ្តីជនជាតិអាមេរិកាំងម្នាក់អាយុ៨៣ឆ្នាំ ក្រោយចាកចេញពីកម្ពុជា។
ក្រសួងបញ្ជាក់ថា ករណីនេះ មុនការចាកចេញរបស់បុគ្គលរូបនេះ ក៏ដូចជាអ្នកទេសចរដ៏ទៃទៀតពីនាវា Westerdam ក្រសួងបានពិនិត្យយ៉ាងល្អិតល្អន់ និងបានធ្វើការជាមួយអង្គការសុខភាពពិភពលោក ព្រមទាំងអង្គការ USCDC របស់អាមេរិក ហើយបានអនុវត្តតាមស្តង់ដារបច្ចេកទេស និងនិយ័តកម្មសុខភាពអន្តរជាតិឆ្នាំ២០០៥ (HR 2005) របស់អង្គការសុខភាពពិភពលោក។
សេចក្តីប្រកាសព័ត៌មានដដែលបន្តថា ចំពោះករណីដែលបានប្រកាសដោយអាជ្ញាធរម៉ាឡេស៊ីនូវភាពវិជ្ជមាន COVID-19 នៅប្រទេសម៉ាឡេស៊ីខាងលើនេះ ក្រសួងសុខាភិបាលកម្ពុជា ស្នើសុំឱ្យអាជ្ញាធរម៉ាឡេស៊ីពិនិត្យឡើងវិញ អំពីលទ្ធផលនៃការធ្វើតេស្តនេះ ឱ្យមានភាពសុក្រឹតឡើងវិញ។
ជាមួយគ្នានេះ ក្រុមហ៊ុន Holland America Line ដែលជាម្ចាស់នៃនាវា Westerdam ក៏បានឱ្យដឹងដែរថា ក្រុមហ៊ុនកំពុងរង់ចាំការធ្វើតេស្តអ្នកដំណើរលើនាវាជាលើកទី២ បន្ទាប់ពីលទ្ធផលទីមួយត្រូវបានរាយការណ៍។ ក្រុមហ៊ុនកំពុងធ្វើការជាមួយមន្រ្តីក្នុងប្រទេសម៉ាឡេស៊ី កម្ពុជា និងអង្គការ USCDC របស់អាមេរិក៕