គយប្រកាសឈប់ប្រើបង្កាន់ដៃពន្ធយានយន្តដែលសរសេរដោយដៃ

2020-03-04 04:46:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គនាយកដ្ឋានគយ និងរដ្ឋាករកម្ពុជា (អគរ) បានប្រកាសបញ្ឈប់ការប្រើប្រាស់បង្កាន់ដៃពន្ធយានយន្តដែលសរសេរដោយដៃ។ នេះបើតាមសេចក្តីជូនដំណឹងរបស់ អគរ កាលពីថ្ងៃទី២ ខែមីនា ឆ្នាំ២០២០។

ក្នុងសេចក្តីជូនដំណឹងនេះលើកឡើងថា កន្លងមកនេះដោយសារប្រព័ន្ធស្វ័យប្រវត្តិកម្មគយ ពុំទាន់គ្របដណ្តប់ពេញលេញនៅទូទាំងប្រទេស មានការិយាល័យគយ និងរដ្ឋាករមួយចំនួន បានចេញបង្កាន់ដៃពន្ធយានយន្តសរសេរដោយដៃជូនធុរជន ហើយបង្កាន់ដៃទាំងនោះ អាចនៅពុំទាន់បានប្រើប្រាស់ក្នុងការចុះបញ្ជីធ្វើផ្លាកលេខនៅឡើយ។

ក្នុងន័យខាងលើនេះ ផ្អែកតាមយន្តការនៃការតភ្ជាប់រវាងប្រព័ន្ធស្វ័យប្រវត្តិកម្មគយ និងប្រព័ន្ធស្វ័យប្រវត្តិកម្មចុះបញ្ជីយានជំនិះ និងដើម្បីសម្រួលដល់នីតិវិធី នៃការចុះបញ្ជីតាមប្រព័ន្ធស្វ័យប្រវត្តិកម្មចុះបញ្ជីយានជំនិះរបស់ក្រសួងសាធារណការ និងដឹកជញ្ជូន អគរ បញ្ជាក់ថា គ្រប់បង្កាន់ដៃពន្ធយានយន្តដែលបានសរសេរដោយដៃ មានថិរវេលាមិនលើសពី ១០ឆ្នាំ (ផ្អែកតាមច្បាប់ស្តីពីគយ) ត្រូវយកមកបញ្ចូលទិន្នន័យទៅក្នុងប្រព័ន្ធស្វ័យប្រវត្តិកម្មគយឡើងវិញ នៅអគរ (សាខាគយ និងរដ្ឋាកររាជធានីភ្នំពេញ) រៀងរាល់ម៉ោងធ្វើការ។

អគរ មិនទទួលខុសត្រូវរាល់ការខាតបង់នានា ដែលបណ្តាលមកពីការខកខានមិនបានអនុវត្តនូវយន្តការខាងលើនេះឡើយ៕

អត្ថបទ៖ សំភី