អាមេរិក សរសើរពីវីរភាពរបស់កងកម្លាំងកម្ពុជា ដែលថែរក្សាសន្តិភាពនៅបរទេស

2017-05-29 06:49:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី២៩ឧសភានេះ ស្ថានទូតអាមេរិក ប្រចាំកម្ពុជា បានសម្តែងការអបអរសាទរ ចំពោះទឹកចិត្តមោះមុត និងភាពក្លាហានរបស់កងកម្លាំងកម្ពុជា ដែលកំពុងធ្វើការដើម្បីឱ្យមានសន្តិភាព និងស្ថិរភាព នៅក្នុងប្រទេសរងគ្រោះដោយសារសង្គ្រាម។ ការលើកឡើងនេះ ធ្វើឡើងក្នុងទិវាអន្តរជាតិនៃអ្នកថែរក្សាសន្តិភាពរបស់ UN ថ្ងៃទី២៩ឧសភា។

អាមេរិក បន្តថា តាំងពីឆ្នាំ ២០០៥ មក កងយោធពលខេមរភូមិន្ទបានបញ្ជូនទាហានចំនួនជាង ៣ពាន់នាក់ ឱ្យធ្វើជាអ្នកថែរក្សាសន្តិភាព នៅតាមតំបន់ ដូចជានៅប្រទេសស៊ូដង់ខាងត្បូង ប្រទេសម៉ាលី និងប្រទេសលីបង់។ អាមេរិក ក៏បានរំលឹកពីការពលីជីវិតរបស់ទាហានកម្ពុជា ៤រូប ក្នុងពេលបំពេញបេសកកម្មនៅសាធារណរដ្ឋអាហ្វ្រិកកណ្តាលផងដែរ។

សហរដ្ឋអាមេរិក គាំទ្រប្រតិបត្តិការថែរក្សាសន្តិភាពរបស់ប្រទេសកម្ពុជា តាមរយៈការហ្វឹកហ្វឺន។ កាលពីពេលថ្មីៗនេះ ទាហានមកពីឆ្មាំជាតិក្នុងរដ្ឋ Idaho បានធ្វើដំណើរ មកខេត្តកំពង់ឆ្នាំង ដើម្បីបង្រៀនជំនាញជាមូលដ្ឋានផ្នែកពេទ្យ និងបច្ចេកទេសក្នុងការឆែកឆេរថយន្ត ដល់កងកម្លាំងផងដែរ៕