តំបន់ទេសចរណ៍ ៤កន្លែង នៅខេត្តកំពត ដែលភ្ញៀវតែងទៅលេងកម្សាន្ត

2017-09-19 01:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខេត្តកំពត មានតំបន់ទេសចរណ៍ធម្មជាតិជាច្រើន ហើយក៏ជាខេត្តគោលដៅទេសចរណ៍ដ៏ធំមួយ ដែលភ្ញៀវភាគច្រើន មិនសូវមើលរំលងខេត្តមួយនេះឡើយ។ ក្នុងនោះតំបន់ទេសចរណ៍សំខាន់ៗ ដែលភ្ញៀវទេសចរភាគច្រើនទៅលេងកម្សាន្តរួមមាន៖

១. ទឹកឈូ

កាត់តាមដងស្ទឹងដ៏ធំមួយនៅក្រុងកំពត និងបត់ស្តាំតាមផ្លូវមួយដែលមានចម្ងាយ៧គីឡូម៉ែត្រ លោក អ្នក នឹងប្រទះភ្នែកឃើញផ្លូវទឹកមួយគួរជាទីចាប់ចិត្តដិតអារម្មណ៍ជាខ្លាំង។ ទីនោះត្រូវបានគេស្គាល់ថារមណីយដ្ឋានទឹកឈូ។ រមណីយដ្ឋានទឹកឈូនេះ មានទឹកដ៏ត្រជាក់និងថ្លាដូចកញ្ចក់។ នៅកន្លែងដ៏មនោរម្យមួយនេះ មានហាងលក់អាហារច្រើនកន្លែង ដោយមានលក់ចាប់ពីផ្លែឈើ រហូតដល់មាន់ខ្វៃនិងត្រីអណ្តែងអាំងជាដើម។

២. ភ្នំបូកគោ

ភ្នំបូកគោមានទីតាំងស្ថិតនៅប្រមាណ៤២គីឡូម៉ែត្រពីទីរួមខេត្ត។ រមណីយដ្ឋាននេះបានកសាងឡើងដោយអាណានិគមនិយមបារាំងនៅឆ្នាំ១៩២២ ក្នុងរជ្ជកាលព្រះបាទស៊ីសុវត្ថិ។ បុរីបូកគោមានកម្ពស់១០៧៥ម៉ែត្រ ដែលមានអាកាសធាតុអំណោយផល និងទេសភាពដ៏ត្រកាល។ ដើមឈើធំៗដែលផ្តល់ម្លប់ដ៏ត្រឈឹងត្រឈៃ ទឹកជ្រោះ និងព្រៃភ្នំក្រំថ្មគិរីបុព្វតាដែលមានសត្វម្រឹគីម្រឹគានិងបក្សាបក្សីជាច្រើន គួរជាទីចាប់ចិត្តដិតអារម្មណ៍ដល់អ្នកទេសចរ។ នៅពេលឡើងដល់កំពូលភ្នំ អ្នកទេសចរអាចមើលឃើញក្រុងកំពត ឆ្នេរកែប ខេត្តព្រះសីហនុ និងទឹកសមុទ្រពណ៌ខៀវស្រងាត់។

៣. ភ្នំកំពង់ត្រាច

បើគេធ្វើដំណើរចាកចេញពីផ្លូវជាតិលេខ៣ ចុះទៅបណ្ដោយផ្លូវជាតិ ៣៣ មិនយូរប៉ុន្មាននឹងដល់ប្រជុំជនស្រុកកំពង់ត្រាច ខេត្តកំពត។ បត់ស្តាំតាមផ្លូវលំសម្បូរជង្ហុកធំៗដែលមានលំនៅឋានអ្នកភូមិខ្លះប្រកបរបរកិនថ្ម ២ទៅ៣គីឡូម៉ែត្រទៀត នឹងទៅដល់ភ្នំកំពង់ត្រាច ដែលសម្បូរដោយច្រាំងថ្មដុះជ្រោងឡើងលើ យ៉ាងមហិមា ដែលមានទិដ្ឋភាពអំណោយផលដល់ការថតភាពយន្តនានា។

៤. ទំនប់ម្លិច

នៅស្រុក ជុំគិរី គឺប្រមាណ៩០គីឡូម៉ែត្រពីភ្នំពេញ តាមផ្លូវជាតិលេខ៣ ទំនប់ម្លិច បានក្លាយជាតំបន់លម្ហែថ្មីមួយទៀត នៅតំបន់ចន្លោះខេត្តតាកែវនិង កំពត។ ពីអតីតកាល ខ្មែរក្រហមបានបង្ខំឲ្យប្រជាជនខ្មែរសាងសងទំនប់ទឹកល្ហល្ហេវនេះឡើងដើម្បីបម្រើកសិកម្មនាអំឡុងឆ្នាំ១៩៧៧។ ប៉ុន្តែអាងទឹកជាប់អតីតកាលជូរចត់ ឥឡូវបានប្រែជាទីសប្បាយសម្រាប់ប្រជាជនខ្មែរ។ អាងទឹកសាបថ្លាឆ្លុះ បានព័ទ្ធដោយសម្រស់បៃតងស្រស់នៃព្រៃភ្នំដ៏ត្រកាល៕