មូលនិធិ Real Madrid សហការបង្កើតសាលាសង្គមកីឡា ជួយកុមារនៅកម្ពុជា
- 2017-09-13 08:57:56
- ចំនួនមតិ 0 | ចំនួនចែករំលែក 0
មូលនិធិ Real Madrid សហការបង្កើតសាលាសង្គមកីឡា ជួយកុមារនៅកម្ពុជា
ចន្លោះមិនឃើញ
មូលនិធិ Real Madrid ដែលជាស្ថាប័នមនុស្សធម៌អន្តរជាតិ បានសហការជាមួយអង្គការដើម្បីភាពញញឹមនៃកុមារ (PSE) ដើម្បីសម្របសម្រួលគម្រោងសាលារៀនសង្គមកីឡា Smart-PSE-RMF ដែលត្រូវបានសម្ពោធដាក់ឲ្យប្រើប្រាស់ដំណាលគ្នានឹងទីលានបាល់ទាត់ស្មៅសិប្បនិម្មិតរបស់ក្រុមហ៊ុន ដែលមានទំហំខ្នាតអន្តរជាតិ ថ្មីសន្លាង នៅថ្ងៃទី១៣ ខែកញ្ញា ឆ្នាំ២០១៧នេះ។
ព្រឹត្តិការណ៍នេះ មានការចូលរួមជាគណៈអធិបតីពីសំណាក់លោក ហង់ ជួនណារ៉ុន រដ្ឋមន្ត្រីក្រសួងអប់រំ និងលោកស្រី Rosa Roncal ប្រធានមូលនិធិ Real Madrid និងលោក លន់ បូរិទ្ធី អគ្គនាយកអង្គការ PSE។
លោកស្រី Rosa Roncal បានឲ្យដឹងថា «គោលដៅរួមគឺមានភាពច្បាស់លាស់ណាស់ គឺកីឡា បំណិនជីវិត និងការអភិវឌ្ឍន៍សង្គម។ សាលារៀនសង្គមកីឡានេះ មិនត្រឹមតែផ្ដល់ផលប្រយោជន៍ដល់សិស្សានុសិស្សដែលមកពីអង្គការ PSE ដើម្បីបានលេង និងរៀនប៉ុណ្ណោះទេ ប៉ុន្តែ ក៏ផ្ដល់អត្ថប្រយោជន៍ដល់គ្រូបង្វឹក ដែលត្រូវផ្ដល់ការហ្វឹកហ្វឺនស្របតាមបទដ្ឋានលំដាប់ពិភពលោកផងដែរ»។
កុមារដែលមានអាយុចន្លោះពី ៦ ដល់ ១៧ឆ្នាំ ទាំងពីរភេទ នឹងមានឱកាសក្នុងការចូលរួមការហ្វឹកហាត់ និងសិក្សាដោយមិនបង់ថ្លៃសិក្សាឡើយ។ ការជ្រើសរើសសម្រាប់ការទទួលយកមកបណ្ដុះបណ្ដាល គឺមិនផ្អែកលើលក្ខណៈវិនិច្ឆ័យផ្នែកអត្តពលកម្មនោះទេ ប៉ុន្តែគឺផ្អែកលើការផ្ដល់អាទិភាពលើអ្នកដែលស្ថិតក្នុងស្ថានភាពក្រីក្រលំបាក។
សូមបញ្ជាក់ថា សាលារៀនសង្គមកីឡានេះ ស្ថិតនៅអគារលេខ ៤០២ ភូមិទ្រា សង្កាត់ស្ទឹងមានជ័យ រាជធានីភ្នំពេញ៕