គ.ជ.ប ប្រាប់ពីមូលហេតុដែលអ្នកមកចុះឈ្មោះបោះឆ្នោត មានចំនួនតិច

2017-09-14 09:21:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ទេព នីថា អគ្គលេខាធិការ គ.ជ.ប បានប្រកាសក្នុងសន្និសីទកាសែតនៅព្រឹកថ្ងៃទី១៤កញ្ញាថា មូលហេតុដែលអ្នកមកចុះឈ្មោះបោះឆ្នោត មានចំនួនតិច ដោយសារតែប្រជាពលរដ្ឋ ធ្វើចំណាកស្រុក និងការផ្លាស់ប្តូរទីលំនៅជាដើម។ ចំនួនប្រជាពលរដ្ឋ មកចុះឈ្មោះបោះឆ្នោតថ្មី រយៈពេល ១៣ ថ្ងៃ ត្រឹមតែ ៨៥៩៧៩នាក់ ដែលត្រូវជា ៥,២៩% គឺជាចំនួនតិចតួច។

លោក ទេព នីថា បន្តថា «មូលហេតុមួយទៀត គឺអាចមកពីទម្លាប់មួយរបស់ប្រជាពលរដ្ឋ ដោយទាល់តែជិតដល់ថ្ងៃផុតកំណត់ ទើបពួកគាត់សម្រុកទៅចុះឈ្មោះបោះឆ្នោត ហើយអ្នកខ្លះ អាចចាំដល់ក្រុមមន្ត្រីចុះឈ្មោះបោះឆ្នោត ចល័តទៅចុះឈ្មោះ នៅតាមភូមិ ជិតផ្ទះរបស់គាត់ ទើបពួកគាត់នាំគ្នាទៅចុះឈ្មោះក៏អាចថាបាន»។

លោក ទេព នីថា អគ្គលេខាធិការ គ.ជ.ប

ចំណែកលោក ហង្ស ពុទ្ធា អ្នកនាំពាក្យ គ.ជ.ប បានលើកឡើងថា គ.ជ.ប មិនមានការព្រួយបារម្ភអ្វីទេ ចំពោះចំនួនអ្នកទៅចុះឈ្មោះបោះឆ្នោតថ្មី មានចំនួនតិចតួច នារយៈពេល ១៣ថ្ងៃនេះ ព្រោះការចុះឈ្មោះបោះឆ្នោត មិនមែន គ.ជ.ប ទើបតែធ្វើ ២ឆ្នាំនេះទេ គឺកន្លងមក ឲ្យតែមុនបុណ្យភ្ជុំបិណ្ឌ ឬក៏ក្រោយបុណ្យភ្ជុំបិណ្ឌ នៅពេលពួកគាត់ទៅលេងផ្ទះនៅស្រុកកំណើត រួចក៏ទៅចុះឈ្មោះបោះឆ្នោត។

លោក ហង្ស ពុទ្ធា អ្នកនាំពាក្យ គ.ជ.ប

គ.ជ.ប បានដំណើរការចុះឈ្មោះអ្នកបោះឆ្នោតថ្មី ចាប់ពីថ្ងៃទី១ ខែកញ្ញា ឆ្នាំ២០១៧ រហូតដល់ថ្ងៃទី៩ ខែវិច្ឆិកា ឆ្នាំ២០១៧។ គ.ជ.ប ប៉ាន់ស្មានថា មានប្រជាពលរដ្ឋ ដែលត្រូវចុះឈ្មោះបោះឆ្នោតថ្មី ចំនួន ១,៦លាននាក់ ក្នុងចំណោមប្រជាពលរដ្ឋ ដែលមានអាយុ ១៨ឆ្នាំឡើងទៅ សរុប ៩,៨លាននាក់។ រីឯចំនួនឈ្មោះអ្នកបោះឆ្នោត ក្នុងបញ្ជីបោះឆ្នោត ឆ្នាំ២០១៦ មានចំនួន ៧,៨លាននាក់៕

អត្ថបទ៖ លីហៀង