រដ្ឋមន្រ្ដីការបរទេសកម្ពុជា-សិង្ហបុរី ចុះ MoU ស្ដីពីការពិគ្រោះយោបល់ផ្នែកនយោបាយ

2017-10-17 06:57:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្ត្រីក្រសួងការបរទេសនៃប្រទេសកម្ពុជា និងសិង្ហបុរី បានចុះហត្ថលេខាលើអនុស្សរណៈយោគយល់គ្នា (MoU) ស្ដីពីការពិគ្រោះយោបល់ផ្នែកនយោបាយ។ ការចុះកិច្ចព្រមព្រៀងនេះ បានធ្វើឡើងក្នុងដំណើរទស្សនកិច្ចផ្លូវការរបស់លោក Vivian Balakrishnan រដ្ឋមន្ត្រីការបរទេសសិង្ហបុរី នៅកម្ពុជា នាព្រឹកថ្ងៃទី១៧ តុលានេះ។

លោកប្រាក់ សុខុន រដ្ឋមន្រ្ដីការបរទេសកម្ពុជា និងលោក Vivian Balakrishnan រដ្ឋមន្រ្ដីការបរទេសសិង្ហបុរី ក្នុងពិធីចុះហត្ថលេខាលើ MoU កាលពីព្រឹកមិញ

លោកជុំ សុន្ទរី អ្នកនាំពាក្យក្រសួងការបរទេស បានឲ្យដឹងថា MoU នេះ នឹងជួយជំរុញកិច្ចសហប្រតិបត្តិការ លើគ្រប់វិស័យរវាងប្រទេសទាំងពីរក៏ដូច ជាការពិភាក្សា និងការផ្លាស់ប្តូរយោបល់ជាមួយគ្នារវាងបញ្ហាតំបន់ និងអន្តរជាតិដែលជាបញ្ហារួមនៃប្រទេសទាំងពីរ និងការពង្រឹងកិច្ចសហការរវាងប្រទេសទាំងពីរក្នុងក្របខ័ណ្ឌអាស៊ាន។

ក្រសួងការបរទេសបានបញ្ជាក់ផងដែរថា ចាប់តាំងពីការភ្ជាប់ទំនាក់ទំនងការទូតនៅឆ្នាំ១៩៦៥ ប្រទេសទាំងពីរមានកិច្ចសហប្រតិបត្តិការល្អប្រសើរ ដូចដែលបានឃើញតាមរយៈការផ្លាស់ប្តូរដំណើរទស្សនកិច្ចកម្រិតខ្ពស់ និងកំណើនពាណិជ្ជកម្មទៅវិញទៅមកប្រចាំឆ្នាំ គួរឲ្យកត់សម្គាល់។

ដំណើរទស្សនកិច្ចរបស់លោក Vivian Balakrishnan នៅកម្ពុជា មានរយៈពេល ២ថ្ងៃ គឺចាប់ពីថ្ងៃទី១៧ ដល់ ១៨ ខែតុលា ឆ្នាំ២០១៧ តបតាមការអញ្ជើញរបស់លោកប្រាក់ សុខុន ទេសរដ្ឋមន្រ្ដី រដ្ឋមន្រ្ដីក្រសួងការបរទេស និងសហប្រតិបត្តិការអន្តរជាតិ។ ក្នុងដំណើរទស្សនកិច្ចផ្លូវការនេះ លោក Vivian នឹងចូលក្រាបបង្គំគាល់ព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅប្រាសាទទេវាវិនិច្ឆ័យ នៃព្រះបរមរាជវាំង ក៏ដូចជាចូលជួបសម្ដែងការគួរសមជាមួយសម្តេចនាយករដ្ឋមន្រ្ដីហ៊ុន សែនផងដែរ៕