លោក ស៊ុន ចាន់ថុល ទៅធ្វើទស្សនកិច្ចនៅក្រុមហ៊ុនរថភ្លើងស្វ័យប្រវត្តិ នៅជប៉ុន

2017-11-16 04:40:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្រ្តីក្រសួងសាធារណការ និងដឹកជញ្ជូន លោក ស៊ុន ចាន់ថុល កាលពីថ្ងៃទី១៥វិច្ឆិកា បានដឹកនាំគណៈប្រតិភូ ក្នុងបេសកកម្មស្វែងរកការពិតផ្នែកភស្តុភារកម្ម អញ្ជើញទៅបំពេញទស្សនកិច្ចនៅក្រុមហ៊ុនYokohama Seaside Line ដែលធ្វើប្រតិបត្តិការប្រព័ន្ធរថភ្លើងស្វ័យប្រវត្តិ (AGT) នៅទីក្រុងតូក្យូ។ នេះបើតាមការឲ្យដឹងពីក្រសួងសាធារណការ នៅថ្ងៃទី១៦វិច្ឆិកានេះ។

រូបថត៖ ក្រសួងសាធារណការ

ក្រុមហ៊ុនបានចែករំលែកបទពិសោធន៍ជាមួយគណៈប្រតិភូពាក់ព័ន្ធនឹងប្រតិបត្តិការ និងការត្រួតពិនិត្យប្រព័ន្ធរថភ្លើងAGT។ ប្រព័ន្ធAGTនេះ គឺជារថភ្លើងធុនស្រាលមួយធ្វើចរាចរណ៍យ៉ាងស្ងាត់ដោយប្រើសំបកកង់កៅស៊ូ កាត់បន្ថយសំឡេងរំខាន និងរំញ័រដែលមានល្បឿនអតិបរមាចំនួន ៦០គីឡូម៉ែត្រ។

រូបថត៖ ក្រសួងសាធារណការ

អ្នកដំណើរប្រមាណជាង៥ម៉ឺននាក់កំពុងប្រើប្រាស់ប្រព័ន្ធរថភ្លើងAGTនេះ ដើម្បីធ្វើដំណើរជុំវិញទីក្រុង ហើយក្នុងពេលថ្មីៗនេះមានប្រតិបត្តិករAGTចំនួន៩ ដែលធ្វើប្រតិបត្តិការនៅក្នុងប្រទេសជប៉ុន។

រូបថត៖ ក្រសួងសាធារណការ

ក្រោយពីសម្តេចនាយករដ្ឋមន្ត្រី ហ៊ុន សែន បានបំពេញទស្សនកិច្ចផ្លូវការទៅកាន់ប្រទេសជប៉ុន នៅក្នុងខែសីហា ឆ្នាំ២០១៧ រដ្ឋាភិបាលជប៉ុនបានយល់ព្រមផ្តល់ជំនួយដល់កម្ពុជាក្នុងការកសាងប្រព័ន្ធប្រតិបត្តិការរថភ្លើងAGT នៅរាជធានីភ្នំពេញ។

អង្គការJICA បានបញ្ជូនក្រុមការងារមួយក្រុម ដើម្បីធ្វើការសិក្សាលទ្ធភាពស្តីពីប្រព័ន្ធប្រតិបត្តិការរថភ្លើងAGT ដែលគ្រោងនឹងបញ្ចប់ក្នុងពេលឆាប់ៗនេះ។ តាមគោលដៅគ្រោងទុក កម្ពុជាគួរតែមានប្រព័ន្ធAGT ដែលអាចដំណើរការបានមុនពេលខ្លួនធ្វើជាម្ចាស់ផ្ទះកីឡាស៊ីហ្គេមនៅឆ្នាំ ២០២៣ខាងមុខ៕

អត្ថបទ៖ សំភី