ក្រសួងមហាផ្ទៃ ស្នើឲ្យរតនាគារជាតិ បង្កកប្រាក់ខែសមាជិកក្រុមប្រឹក្សាឃុំ-សង្កាត់ មកពីបក្សសង្គ្រោះជាតិ

2017-11-17 06:15:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គនាយកដ្ឋានរដ្ឋបាល នៃក្រសួងមហាផ្ទៃ បានស្នើទៅអគ្គនាយកដ្ឋានរតនាគារជាតិ បង្កកប្រាក់ឧបត្ថម្ភប្រចាំខែជូនសមាជិកក្រុមប្រឹក្សាឃុំ សង្កាត់ មកពីគណបក្សសង្គ្រោះជាតិ។ ការស្នើបង្កកប្រាក់ឧបត្ថម្ភនេះ បានធ្វើឡើងមួយថ្ងៃបន្ទាប់ពីតុលាការកំពូលបានសម្រេចរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧។

យោងតាមលិខិតរបស់លោកប្រាក់ សំអឿន អគ្គនាយកដ្ឋានរដ្ឋបាល នៃក្រសួងមហាផ្ទៃ ចុះថ្ងៃទី១៧ ខែវិច្ឆិកានេះ បានជម្រាបជូនទៅអគ្គនាយកដ្ឋានរតនាគារជាតិថា តុលាការកំពូលបានសម្រេចរំលាយគណបក្សគណបក្សសង្គ្រោះជាតិ តាមរយៈសាលដីកាចុះថ្ងៃទី១៦ ខែវិច្ឆិកា ឆ្នាំ២០១៧។

លិខិតនោះឲ្យដឹងថា ផ្អែកតាមច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ ករណីគណបក្សសង្គ្រោះជាតិ ត្រូវបានរំលាយដោយតុលាការ នោះបញ្ជីបេក្ខជននិងសមាជិកក្រុមប្រឹក្សាទាំងអស់ នៃគណបក្សសង្គ្រោះជាតិ លែងមានសុពលភាព និងលែងមានគុណសម្បត្តិទៅទៀតហើយ។ ហេតុនេះក្រសួងមហាផ្ទៃស្នើសុំបង្កកបើកប្រាក់ខែឧបត្ថម្ភប្រចាំខែជូនសមាជិកក្រុមប្រឹក្សាឃុំ-សង្កាត់ មកពីគណបក្សសង្គ្រោះជាតិ ចាប់ពីថ្ងៃទី១៦ ខែវិច្ឆិកា ឆ្នាំ២០១៧ តទៅ៕

អត្ថបទ៖ សោភា