អាជ្ញាធរជាតិអប្សរា ចុះកិច្ចព្រមព្រៀងជាមួយមន្ទីរបេតិកភណ្ឌខេត្តសានទុង លើតំបន់អង្គរ និងក្រុង Jinging
- 2017-11-17 13:10:50
- ចំនួនមតិ 0 | ចំនួនចែករំលែក 0
អាជ្ញាធរជាតិអប្សរា ចុះកិច្ចព្រមព្រៀងជាមួយមន្ទីរបេតិកភណ្ឌខេត្តសានទុង លើតំបន់អង្គរ និងក្រុង Jinging
ចន្លោះមិនឃើញ
លោក ហង់ ពៅ អគ្គនាយករងនៃអាជ្ញាធរជាតិអប្សរា បានចុះហត្ថលេខាជាមួយ តំណាងមន្ទីរបេតិកភណ្ឌខេត្តសានទុង លើការពង្រឹងកិច្ចសហប្រតិបត្តិការលើវិស័យទេសចរណ៍វប្បធម៌ និងបេតិកភណ្ឌក្រុង Jining និងតំបន់អង្គរ កាលពីថ្ងៃទី១៦ខែវិច្ឆិកា។ នេះបើតាមការចេញផ្សាយរបស់អាជ្ញាធរជាតិអប្សរានៅថ្ងៃទី១៧វិច្ឆិកានេះ។
លោកស្រី Wang Lei ដែលបានដឹកនាំគណៈប្រតិភូ ទស្សនកិច្ចនៅខេត្តសៀមរាប បានបង្ហាញពីសក្តានុពលនៅខេត្តសានទុងថា ជាខេត្តមួយស្ថិតនៅភាគខាងកើតនៃប្រទេសចិន មានសេដ្ឋកិច្ចរីកចម្រើនលំដាប់ទី៣ និងជាខេត្តមានប្រជាជនច្រើនលំដាប់ទី២ក្នុងប្រទេស។ បើនិយាយពីប្រវត្តិសាស្ត្រនិងវប្បធម៌នៅខេត្តនេះ គឺមានតាំងពី៨ពាន់ឆ្នាំមុនមកម្ល៉េះ ដោយមានសំណេរឯកសារ និងការស្រាវជ្រាវពីបុរាណវិទូច្បាស់លាស់។
លោកស្រីបន្ថែមថា លើសពីនោះទៀត អ្វីដែលល្បីល្បាញជាងគេនៅខេត្តនេះ គឺជាស្រុកកំណើតរបស់ទស្សនវិទូ ខុងជឺ និងមានតំបន់ទេសចរណ៍ល្បីល្បាញជាច្រើនដូចជា ភ្នំថៃសាន មហាកំពែង ដែលសុទ្ធតែជាសម្បត្តិបេតិកភណ្ឌពិភពលោក និងមានឆ្នេរសមុទ្រជាង ៣ពាន់គីឡូម៉ែតវែងជាងគេ។ ក្នុងនោះមានបេតិកភណ្ឌវប្បធម៌ចំនួន ១៩៧ដែលទទួលស្គាល់ពីរដ្ឋាភិបាលចិន និងរមណីយដ្ឋានវប្បធម៌ និងអភិរក្ស ១៧៩១កន្លែងដែលបានទទួលស្គាល់ដោយខេត្តសានទុងថែមទៀត។
លោកស្រី Wang Lei រំពឹងថា ខេត្តសានទុងនឹងផ្តល់អត្ថប្រយោជន៍យ៉ាងច្រើនក្នុងការពង្រឹងចំណងមិត្តភាពនៃប្រទេសទាំង២ ដែលមានតាំងពីយូរអង្វែងមកហើយ។ ពិសេសផ្តល់ឱកាសសហការគ្នាជាបន្តទៀតទៅអនាគតកាន់តែប្រសើរឡើងរវាងក្រុង Jining និងអាជ្ញាធរជាតិអប្សរាលើផ្នែកគ្រប់គ្រងវប្បធម៌ទេសចរណ៍។
លោក ហង់ ពៅ ក៏បានលើកឡើងថា នេះជាការចាប់ផ្តើមដ៏ល្អនៃទំនាក់ទំនងនៃស្ថាប័នទាំង២ លើផ្នែកមិត្តភាពនិងការងារគ្រប់គ្រង ការអភិរក្សបេតិកភណ្ឌវប្បធម៌។ លោកបន្តទៀតថា បើទោះបីអង្គរទើបមានប្រវត្តិជាង៣ពាន់ឆ្នាំ តែក៏ជាអាណាចក្រដ៏ល្បីល្បាញកាលពីអតីតកាល មានប្រាង្គប្រាសាទជាង ៦០០ នៅពាសពេញខេត្តសៀមរាប រួមទាំងវប្បធម៌អរូបីជាច្រើនដែលទទួលបានការយកចិត្តទុកដាក់ ថែរក្សាពីសំណាក់ប្រជាជនក្នុងតំបន់ និងអាជ្ញាធរជាតិអប្សរា។
គួរបញ្ជាក់ដែរថា ក្នុងតំបន់អង្គរមានកិច្ចសហការអន្តរជាតិជួសជុសប្រាសាទ ជាមួយ១៤ប្រទេស និង២៥គម្រោង ក្នុងនោះក៏មានប្រទេសចិនផងដែរ ដែលបានជួសជុលប្រាសាទចំនួន២ គឺប្រាសាទតាកែវ និងចៅសាយទេវតា៕