លោក ដូណាល់ ត្រាំ រងការរិះគន់យ៉ាងច្រើន ក្រោយប្រកាសក្រុងយេរូសាឡឹម ជារដ្ឋធានីអ៊ីស្រាអែល

2017-12-07 02:04:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយប្រធានាធិបតីអាមេរិក លោក ដូណាល់ ត្រាំ បានប្រកាសទទួលស្គាល់ក្រុងយេរ៉ូសាឡឹម ជារដ្ឋធានីនៃប្រទេសអ៊ីស្រាអែលនោះ បានទទួលរងការរិះគន់យ៉ាងច្រើន រួមទាំងសម្ព័ន្ធមិត្តរបស់ខ្លួនទៀតផង ដូចជាអង្គការសហប្រជាជាតិ សហភាពអឺរ៉ុប សម្តេចប៉ាប និងប្រទេសចិនផងដែរ។

លោក Antonio Guterres អគ្គលេខាធិការ UN បានរិះគន់ថា ការប្រកាសទទួលស្គាល់បែបនេះ នឹងបំផ្លាញសន្តិភាពរវាងអ៊ីស្រាអែល និងប៉ាឡេស្ទីន។ ដើម្បីដោះស្រាយបញ្ហា គឺតម្រូវឲ្យភាគីទាំង២នេះ ចរចាគ្នាដោយផ្ទាល់ ដោយផ្អែកលើសេចក្តីសម្រេចរបស់ UN។

លោកស្រីឯកអគ្គរដ្ឋទូតជាន់ខ្ពស់របស់សហភាពអឺរ៉ុប Federica Mogherini បានបង្ហាញក្តីបារម្ភថា ការទទួលស្គាល់នេះ នឹងធ្វើឲ្យប៉ះពាល់ដល់សន្តិភាព។ គោលជំហររបស់សហភាពអឺរ៉ុប ចង់ឲ្យក្រុងយេរ៉ូសាឡឹម ជារដ្ឋធានី១ របស់រដ្ឋចំនួន២ គឺអ៊ីស្រាអែល និងប៉ាឡេស្ទីន។

ជនជាតិប៉ាឡេស្ទីន ដុតរូបលោក ដូណាល់ ត្រាំ

ចំណែកមេដឹកនាំបុរី វ៉ាទីកង់ សម្តេចប៉ាប ក៏បានបញ្ចេញក្តីបារម្ភយ៉ាងខ្លាំងចំពោះស្ថានការណ៍នេះផងដែរ។ សម្តេចប៉ាប បានចាត់ទុកយេរ៉ូសាឡឹម ជាក្រុងដ៏ពិសិដ្ឋតែ១គត់ សម្រាប់ជនជាតិជ្វិស គ្រិស្តសាសនិក និងជនមូស្លីម។

មេដឹកនាំអង់គ្លេស បារាំង អាល្លឺម៉ង់ និងអ៊ីតាលី សុទ្ធតែបានបង្ហាញការសោកស្តាយចំពោះការប្រកាសទទួលស្គាល់របស់លោក ដូណាល់ ត្រាំ។ មេដឹកនាំទាំងនោះ បានបន្តជំរុញឲ្យ អ៊ីស្រាអែល-ប៉ាឡេស្ទីន ដោះស្រាយជម្លោះដោយទ្វេភាគី។

រីឯអ្នកនាំពាក្យក្រសួងការបរទេសចិន លោក Geng Shuang បានរិះគន់ថា ការប្រកាសរបស់លោក ដូណាល់ ត្រាំ នឹងបង្កឲ្យមានភាពតានតឹងនៅក្នុងតំបន់នោះ។ បញ្ហាក្រុងយេរ៉ូសាឡឹម ជារឿងដ៏ស្មុគស្មាញ និងរសើប។ ភាគីទាំងអស់ គួរតែប្រុងប្រយ័ត្ន ដើម្បីរក្សាសន្តិភាព ចៀសវាងការបែងចែកថ្មីណាមួយក្នុងតំបន់នោះ៕

ប្រភព៖ nytimes ប្រែសម្រួល៖ សំភី