កាំកុងត្រូល ប្រកាស​ពី​ម្សៅ​ទឹក​ដោះ​គោ​របស់​បារាំង ដែល​ប៉ះពាល់​ដល់​សុខភាព​កុមារ

  • 2017-12-23 02:21:09
  • ចំនួនមតិ 0 | ចំនួនចែករំលែក 0

ចន្លោះមិនឃើញ


អគ្គនាយកដ្ឋាន​កាំកុងត្រូល​នៃ​ក្រសួង​ពាណិជ្ជកម្ម បាន​ឲ្យដឹង​ថា ក្រសួង​សេដ្ឋកិច្ច និង​ហិរញ្ញវត្ថុ​បារាំង បាន​រក​ឃើញ​នូវ​ការ​ធ្វើ​ឲ្យ​ប៉ះពាល់​ដល់​សុខភាព​កុមារ​តូចៗ និង​ទារក ដោយសារ​ផលិតផល​ម្សៅ​ទឹក​ដោះ​គោ​ផ្សេងៗ ដែល​ផលិត​ដោយ​ក្រុមហ៊ុន GROUPE LACTALIS ។

អគ្គនាយកដ្ឋាន​កាំ​កុង​ត្រូល ក៏​បាន​អំពាវនាវ​ដល់​សាធារណជន កុំឲ្យ​ទិញ​ផលិតផល​ដែល​មាន​អត្តសញ្ញាណ​ដូច​ខាងលើ និង​ត្រូវ​រាយការណ៍​ជូន​មន្ត្រី​មាន​សមត្ថកិច្ច ក្នុង​ករណី​ដែល​ជួប​ប្រទះ​ផង​ដែរ។

ផលិតផល​ចិញ្ចឹម​ទារក និង​កុមារ​តូចៗ ខាងលើ បាន​បង្ក​ការ​ប៉ះពាល់​ទៅ​លើ​សុខភាព​ទារក និង​កុមារ​តូច​ចំនួន ២៦​នាក់ នៅ​ប្រទេស​បារាំង ដោយសារ​បាក់តេរី Salmonella Agona ដែល​មាន​ក្នុង​ផលិតផល​នោះ។ ក្រុមហ៊ុន បាន​ប្រកាស​ប្រមូល​ត្រឡប់​មក​វិញ នូវ​ផលិតផល​ដែល​មាន​បញ្ហា​ពី​ទីផ្សារ​ប្រទេស​បារាំង និង​បណ្ដា​ប្រទេស​នានា ដែល​ខ្លួន​បាន​ចែកចាយ​ផងដែរ។

ការ​ចម្លង​បាក់តេរី Salmonella Agona មាន​ចំពោះតែ​លើ​ផលិតផល​ដែល​មាន​អត្តសញ្ញាណ មាន​ដូចជា៖ ​ឈ្មោះ​ផលិតផល ( Article designation ) លេខ​ឡូ​តិ៍ ( Batch Number ) ថ្ងៃ ខែ ឆ្នាំ​ប្រើប្រាស់​ជា​អប្ប​បរិ​មា ( DDM : Date of Minimal Durability ) ដែល​ស្ថិត​ក្នុង​បញ្ជី​ឧបសម្ពន្ធ​នៃ​បទបញ្ជា​របស់​ក្រសួង​សេដ្ឋកិច្ច និង​ហិរញ្ញវត្ថុ​ប្រទេស បារាំង ដែល​ជូន​ភ្ជាប់​មក​ជា​មួយ​ប៉ុណ្ណោះ​។ វត្តមាន​បាក់តេរី Salmonella ក្នុង​ផលិតផល​ខាងលើ​នឹង​បង្ក​គ្រោះថ្នាក់​ដល់​សុខភាព​ទារក និង​កុមារ​តូចៗ ដោយ​បង្ក​ឲ្យ​មាន​ជំងឺ​ប្រព័ន្ធ​រំលាយ​អាហារ ឬ គ្រុនពោះវៀន ជាដើម៕

អត្ថបទ៖ លាភ.

អត្ថបទថ្មី
;