មេដឹកនាំ ៥ប្រទេស នឹងមកដល់កម្ពុជា នៅសប្តាហ៍ក្រោយ

2018-01-05 13:31:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មេដឹកនាំប្រទេសចំនួន ៥ រួមមាន៖ លោក លី ខឺឈាង (Li Keqiang) នាយករដ្ឋមន្រ្តីចិន លោក ថងលូន ស៊ីស៊ូលីត (Thongloun Sisoulith) នាយករដ្ឋមន្រ្តីឡាវ លោក មិន ស្វេ (Myint Swe) អនុប្រធានាធិបតីមីយ៉ាន់ម៉ា លោក ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្តីថៃ និង លោក ង្វៀន សួនហ៊្វុក (Nguyen Xuan Phuc) នាយករដ្ឋមន្រ្តីវៀតណាម នឹងដឹកនាំគណៈប្រតិភូអញ្ជើញមកចូលរួមកិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាង លើកទី២ នៅរាជធានីភ្នំពេញ ដែលនឹងប្រព្រឹត្តទៅនៅថ្ងៃទី ១០ ខែមករា ឆ្នាំ២០១៨។ ការអញ្ជើញមកកម្ពុជា របស់មេដឹកនាំទាំង ៥ប្រទេស គឺតបតាមការអញ្ជើញរបស់សម្តេចនាយករដ្ឋមន្រ្តី ហ៊ុន សែន។

លោក ប្រាយុទ្ធ ចាន់អូចា ក្នុងអំឡុងទស្សនកិច្ចនៅកម្ពុជា កាលពីខែកញ្ញា ឆ្នាំ២០១៧

សម្តេច ហ៊ុន សែន និងលោក លី ខឺឈាង នឹងធ្វើជាសហប្រធានកិច្ចប្រជុំដ៏សំខាន់នេះ ដែលមានមូលបទ “ទន្លេរបស់យើងដើម្បីសន្តិភាព និងការអភិវឌ្ឍប្រកបដោយចីរភាព”។ ថ្នាក់ដឹកនាំប្រទេសទាំង៦ នៃកិច្ចសហប្រតិបត្តិការមេគង្គ-ឡានឆាង នឹងធ្វើការពិភាក្សាលើបញ្ហាសំខាន់ៗដើម្បីអភិវឌ្ឍអនុតំបន់ទន្លេមេគង្គ ផ្តោតជាសំខាន់ទៅលើការតាំងចិត្តក្នុងការរក្សាសន្តិភាព ស្ថិរភាព ការអភិវឌ្ឍប្រកបដោយចីរភាព និងវិបុលភាពនៃអនុតំបន់ទន្លេមេគង្គ។

លោក លី ខឺឈាង ស្វាគមន៍ដំណើរទស្សនកិច្ចរបស់សម្តេច ហ៊ុន សែន នៅក្រុងប៉េកាំង កាលពីឆ្នាំ២០១៣

កិច្ចប្រជុំកំពូលនេះ ក៏នឹងផ្តោតសារៈសំខាន់ដល់កិច្ចសហប្រតិបត្តិការអភិវឌ្ឍន៍សេដ្ឋកិច្ច-សង្គម របស់ប្រទេសអនុតំបន់ ការធ្វើឲ្យប្រសើរឡើងសុខុមាលភាពប្រជាជន ការបំព្រួញគម្លាតអភិវឌ្ឍន៍នៅក្នុងចំណោមប្រទេស ក្នុងការគាំទ្រដល់ការកសាងសហគមន៍អាស៊ាន និងការជំរុញកិច្ចសហប្រតិបត្តិការត្បូង-ត្បូង ដើម្បីរួមចំណែកបន្ថែមទៀតដល់ការអនុវត្តរបៀបវារៈឆ្នាំ២០៣០ របស់អង្គការសហប្រជាជាតិ សម្រាប់ការអភិវឌ្ឍប្រកបដោយចីរភាព។

កិច្ចប្រជុំត្រូវបានរំពឹងទុកថានឹងអនុម័ត ឯកសារចំនួន៤ ដូចខាងក្រោម៖

១. សេចក្តីថ្លែងការណ៍ទីក្រុងភ្នំពេញនៃកិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាង លើកទី២។

២. ផែនការសកម្មភាព ៥ឆ្នាំនៃកិច្ចសហប្រតិបត្តិការមេគង្គ-ឡានឆាង ២០១៨-២០២២។

៣. បញ្ជីរួមនៃគម្រោងកិច្ចសហប្រតិបត្តិការដំណាក់កាលទី២។

៤. របាយការណ៍នៃក្រុមការងាររួមតាមវិស័យអាទិភាពទាំង៦។

នៅមុនពេលបញ្ចប់កិច្ចប្រជុំនេះ នឹងមានពិធីផ្ទេរតួនាទីប្រធានទៅប្រទេសឡាវ ហើយនឹងបន្តដោយការធ្វើសន្និសីទសារព័ត៌មានរួមគ្នាដោយសហប្រធានផងដែរ៕

អត្ថបទ៖ សោភា