ហង្សមាស៖កូនទាំង៣របស់ព្រាប សុវត្ថិ ក្លាយជាតារាចម្រៀងព្រមគ្នា ព្រោះមានសមត្ថភាព

2018-01-08 07:25:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គនាយករងផលិតកម្មហង្សមាស អ៊ឹង គឹមលាង បានបកស្រាយដើម្បីឲ្យអស់ចម្ងល់ ក៏ដូចជាឲ្យបានដឹងកាន់តែច្បាស់ពីបញ្ហាកូនប្រុសទាំង៣របស់តារាចម្រៀង ព្រាប សុវត្ថិ ក្លាយជាតារាចម្រៀងពេញសិទ្ធិ។ អ្នកស្រី បានរៀបរាប់ថា ការយកចូលនេះ វាជាសមត្ថភាពពិតប្រាកដរបស់អ្នកទាំង៣។ ហើយពួកគេសុទ្ធតែមានប្រជាប្រិយភាពស្រាប់ពីអ្នកគាំទ្រមួយចំនួនធំ តាំងពីមុនចូលផលិតកម្មទៅទៀត។

«ការស្វែងរកធនធានថ្មី គឺមិនមែនមើលតែលើការប្រឡងមួយមុខប៉ុណ្ណោះទេ គឺយើងមានក្រុមការងារផ្សេង ចាំតាមដាន ពីសមត្ថភាពអ្នកដែលមាននៅខ្មែរ។ ពួកគេទាំង៣នេះហើយ ដែលជាធនធានមួយដ៏កម្រ ហើយមានជាប់សាច់ឈាម និងទេពកោសល្យដូចលោកឪពុក ដែលជាកំពូលតារាចម្រៀងប្រចាំព្រះរាជាណាចក្រកម្ពុជា និងប្រចាំហង្សមាស ចឹងពួកយើងត្រូវតែក្តោបឱកាសនេះ ដើម្បីជារសជាតិថ្មីសម្រាប់អ្នកគាំទ្រសិល្បៈខ្មែរផងដែរ»។ នេះជាសម្ដីរបស់អគ្គនាយករងផលិតកម្មហង្សមាសខាងលើ។

«ម្យ៉ាងពួកគេទាំងបី សុទ្ធតែមានសមត្ថភាព ទេពកោសល្យស្រាប់ ដែលពួកយើងបានសម្លឹងឃើញយូរមកហើយ ហើយទាំងខាងផលិតកម្មក៏ដូចជា តារាចម្រៀងថ្មីទាំង៣ នឹងព្យាយាមរកអ្វីដែលថ្មី ប្លែក ដើម្បីកំដរបរិយាកាសដល់អ្នកគាំទ្រទាំងអស់គ្នា និងឲ្យក្លាយជាអនាគត Super Star ដូចលោកឪពុកគេផងដែរ»។ អ្នកស្រី បន្ថែម។

ការលើកឡើងនេះ ត្រូវបានធ្វើឡើងក្នុងសន្និសីទផ្លូវការមួយបង្ហាញពីសមាសភាពកូនប្រុសទាំង៣ របស់លោក ព្រាប សុវត្ថិ គឺ សុវត្ថិ មុនីវណ្ណ សុវត្ថិ មុនីនាគ និង សុវត្ថិ សិរីវុឌ្ឍ ដែលបានក្លាយជាតារាចម្រៀងពន្លកថ្មីពេញសិទ្ធិនៅក្នុងផលិតកម្មហង្សមាស៕