ការប្រកួតរបស់ក្រុម CV11, ធារី និង សុខផេង ដំណើរការដល់ណាហើយ?

2018-01-09 02:23:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចាប់ពីថ្ងៃទី១ ខែមករា ឆ្នាំ២០១៨ ក្រុមនានានៅលីគកំពូលម៉ាឡេស៊ីបានរៀបចំជាការប្រកួតមិត្តភាពកម្ដៅសាច់ដុំ ទាំងក្នុងនិងក្រៅប្រទេស ដើម្បីត្រៀមខ្លួនសម្រាប់លីគកំពូលដែលគ្រោងចាប់ផ្ដើមនៅខែក្រោយ។ ទន្ទឹមនេះ ក្រុម Pahang FA របស់ ចាន់ វឌ្ឍនាកា បានធ្វើដំណើរទៅសមជើងនៅប្រទេសថៃ, Terengganu FC របស់ ធារី ចន្ថាប៊ីន មកលេងនៅកម្ពុជា ខណៈ PKNP FC របស់ កែវ សុខផេង ក៏មានជាការប្រកួតនៅម៉ាឡេស៊ីផងដែរ។

ចំពោះដំណើរការរបស់ក្រុម Pahang FA មកទល់ពេលនេះ ពួកគេប្រកួតបានចំនួន២លើក ដោយឈ្នះទាំង២លើក។ ក្នុងនោះ បានយកឈ្នះក្រុម Muangthong United B ៣-១ និង បំបាក់ក្រុម Air Force Central របស់ថៃ ដោយលទ្ធផល ៤-១។ ខ្សែប្រយុទ្ធកម្ពុជា ចាន់ វឌ្ឍនាកា បានដើរតួយ៉ាងសំខាន់ក្នុងការប្រកួត ដោយបានបង្កើត Assist ឲ្យមិត្តរួមក្រុមក្នុងជំនួបទល់នឹង Muangthong United B ។

ចំណែក ក្រុម Terengganu វិញ ក្នុង២ប្រកួតកន្លងទៅកម្ពុជា បានយកឈ្នះក្រុមព្រះខ័នរាជស្វាយរៀងដោយលទ្ធផល ១-០ តែចាញ់ក្រសួងការពារជាតិ កាលពីម្សិលមិញ ដោយលទ្ធផល ៦-៣ ។ គេសង្កេតឃើញ ខ្សែបម្រើកម្ពុជា ធារី ចន្ថាប៊ីន ក៏មានវត្តមានក្នុងការប្រកួតនេះផងដែរ។

ដោយឡែក ចំពោះក្រុម PKNP FC របស់ កែវ សុខផេង ក្នុងខែមករានេះ បានប្រកួតមិត្តភាពទល់នឹងក្រុម PKNS FC ដោយទទួលបរាជ័យក្នុងលទ្ធផល ៣-១ កាលពីពេលថ្មីៗកន្លងទៅនេះ នៅកីឡដ្ឋាន Penang នៅប្រទេសម៉ាឡេស៊ី។

បើតាមកាលវិភាគ ក្រុម Pahang នឹងត្រូវប៉ះក្រុម Gyeongnam FC របស់កូរ៉េខាងត្បូង នៅថ្ងៃទី៩មករានេះ នៅប្រទេសថៃ ខណៈក្រុម Terengganu នឹងទៅសួរសុខទុក្ខក្រុមភ្នំពេញក្រោន នៅកីឡដ្ឋាន RSN នៅម៉ោង ៦:៣០ នាទីល្ងាចនេះ៕

អត្ថបទ៖ លាភ.