ក្រុមហ៊ុនចិន សម្រេចទិញអង្ករពីកម្ពុជា ៥ម៉ឺនតោនក្នុង១ឆ្នាំ

2018-01-12 09:44:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងលើភាពជាដៃគូ រវាងរដ្ឋាភិបាលចិន និងកម្ពុជា ក្នុងការលើកទឹកចិត្តឲ្យមានការពង្រឹង និងពង្រីកវិស័យពាណិជ្ជកម្មឲ្យកាន់តែធំថែមទៀតនោះ ក្រុមហ៊ុន Hubei Zhenghe Rice Industry Co.,Ltd របស់ចិន បានចុះហត្ថលេខាលើអនុស្សរណៈយោគយល់ទិញស្រូវ ពីក្រុមហ៊ុនអង្គរកសិកម្មរុងរឿង របស់កម្ពុជាចំនួន ៥០.០០០តោន ក្នុង ១ឆ្នាំ ទៅកាន់ប្រទេសចិន។

តំណាងក្រុមហ៊ុន Hubei Zhenghe Rice Industry និងក្រុមហ៊ុនអង្គរកសិកម្មរុងរឿង

លោក Chieu Arnusorn តំណាងក្រុមហ៊ុនអង្គរកសិកម្មរុងរឿង បានឲ្យដឹងថា៖ «អនុស្សរណៈយោគយល់នេះនឹងបង្កើនការនាំចេញអង្ករកម្ពុជាទៅកាន់ប្រទេសចិនជាង ៥០.០០០ តោនក្នុងមួយឆ្នាំ។ នេះគឺជាជោគជ័យរបស់រដ្ឋាភិបាលនៃប្រទេសទាំងពីរដែលបានបង្កើតនូវអនុស្សរណៈយោគយល់ដ៏សំខាន់មួយក្នុងការ ទិញ-លក់ អង្ករ»។

លោកបន្តថា៖ «អនុស្សរណៈយោគយល់នេះត្រូវបានប៉ាន់ប្រមាណថាមានតម្លៃជាទឹកប្រាក់ប្រមាណ ៤០លានដុល្លារ ដែលបង្កើតប្រាក់ចំណូលដល់កម្ពុជា។ ការធ្វើបែបនេះនឹងជួយបង្កើនចំណូលដល់កសិករប្រមាណ ៤០.០០០ គ្រួសារ ដែលចំណុះក្រុមហ៊ុនក្នុងការដាំដុះស្រូវនាងម្លិះក្នុងខេត្តកំពង់ស្ពឺ»។

ការចុះហត្ថលេខានេះ ធ្វើឡើងមុនដំណើរទស្សនកិច្ចមកដល់របស់ លោក លី កឺឈាង (Li Keqiang) ដែលកំពុងធ្វើទស្សនកិច្ចលើគម្រោងជាច្រើន និងជាភ្ញៀវកិត្តិយសរបស់រាជរដ្ឋាភិបាលកម្ពុជានៅសប្តាហ៍នេះ។

ទំហំពាណិជ្ជកម្មទ្វេភាគីរវាង ចិន-កម្ពុជា មានចំនួនជាង ៥ពាន់លានដុល្លារ នៅឆ្នាំ ២០១៧ ដោយកើនពី ៣,៧៥ ពាន់លានដុល្លារក្នុងឆ្នាំ ២០១៦។ នៅឆ្នាំ ២០១៨ នេះ គឺជាឆ្នាំនៃខួបលើកទី ៦០ នៃទំនាក់ទំនងចិន - កម្ពុជា ដែលរដ្ឋាភិបាល នៃប្រទេសទាំងពីរបានរិះរកគ្រប់វិធីសាស្ត្រ ដើម្បីបង្កើនផលប្រយោជន៍ឱ្យគ្នាទៅវិញទៅមក៕

អត្ថបទ៖ ដេត លីដា