កប៉ាល់រុករក យន្តហោះ MH370 បាត់ខ្លួន៣ថ្ងៃ នៅជិតឆ្នេរប្រទេសអូស្ត្រាលី

2018-02-07 06:46:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កប៉ាល់ Seabed Constructor បានបាត់ចេញពីរ៉ាដា រយៈពេលជិត ៣ថ្ងៃ បន្ទាប់ពីប្រព័ន្ធផ្ដល់សញ្ញាសម្គាល់ស្វ័យប្រវត្តិ (AIS) របស់វាបានរលត់ កាលពីថ្ងៃទី៣១ ខែមករា ឆ្នាំ២០១៨ ក្នុងបេសកកម្មស្វែងរកយន្តហោះ MH370 របស់ក្រុមហ៊ុនអាកាសចរណ៍ម៉ាឡេស៊ី។

កប៉ាល់ Seabed Constructor

ប្រព័ន្ធ AIS បានវិលត្រឡប់មករកភាពធម្មតាវិញ ក្រោយ ៨០ម៉ោង ប៉ុន្តែចំពោះមូលហេតុជាក់លាក់ដែលធ្វើឲ្យបាត់បង់ការទាក់ទងនេះ មិនទាន់មានការបញ្ជាក់នៅឡើយទេ ហើយទីតាំងរបស់កប៉ាល់ក្នុងអំឡុងពេលបាត់ពីរ៉ាដា ក៏មិនមានអ្នកដឹងផងដែរ។

កប៉ាល់ Seabed Constructor បានចេញប្រតិបត្តិការរុករកយន្តហោះ MH370 អស់រយៈពេលជាង ២សប្ដាហ៍មកហើយ។ បេសកកម្មនេះ ជាការស្ម័គ្រចិត្តរបស់ក្រុមហ៊ុន Ocean Infinity ប៉ុន្តែរដ្ឋាភិបាលម៉ាឡេស៊ី បានប្រកាសថា នឹងផ្ដល់ប្រាក់រង្វាន់ចំនួនចន្លោះពី ២០ ទៅ ៧០ លានដុល្លារអាមេរិក ដល់ក្រុមហ៊ុននេះ ប្រសិនបើពួកគេអាចរកឃើញយន្តហោះដែលបាត់ខ្លួន ក្នុងរយៈពេល ៩០ថ្ងៃ។

ទាក់ទងនឹងការបាត់ចេញពីរ៉ាដានេះ អ្នកនាំពាក្យក្រុមហ៊ុនដដែលបានពន្យល់ថា កប៉ាល់របស់ខ្លួនបានព្យាយាមបត់ត្រឡប់ក្រោយ ដើម្បីបន្តការរុករករបស់ខ្លួន។ ទោះជាយ៉ាងណា អ្នកជំនាញមួយចំនួន បានអះអាងថា នេះអាចជាចេតនារបស់កប៉ាល់ ដើម្បីបំបិទមិនឲ្យដឹងពីការព្យាយាមបង្វែរទៅរុករកកំណប់ ដែលលិចកប់នៅបាតសមុទ្រជាមួយសំពៅមួយគ្រឿង កាលពីជាង ១០០ឆ្នាំមុន។

ខ្មោចសំពៅនេះ ត្រូវបានរកឃើញកាលពីឆ្នាំ២០១៥ នៅភាគនិរតីឆ្នេរសមុទ្រនៃប្រទេសអូស្ត្រាលី អំឡុងការរុករកយន្តហោះ MH370 ដែលដឹកនាំដោយប្រទេសអូស្ត្រាលី ពោលគឺនៅក្បែរគ្នានឹងទីតាំងដែលត្រូវបានសង្ស័យថា ជាទីតាំងដែល MH370 ធ្លាក់។ វាមានអាយុកាលប្រហែល ២០០ឆ្នាំ។ នេះបើតាមការបញ្ជាក់នៅលើយុថ្ការបស់សំពៅ។