ឃោសនាថ្ងៃទី១៖ CPP ចេញសកម្មភាពច្រើនជាងគេ ឯហ៊្វុនស៊ិនប៉ិច ចាក់មេក្រូ

2018-02-11 02:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសថា នៅថ្ងៃទី១ នៃយុទ្ធនាការឃោសនាបោះឆ្នោតព្រឹទ្ធសភា កាលពីថ្ងៃទី១០ ខែកុម្ភៈម្សិលមិញ គណបក្សប្រជាជនកម្ពុជា បានធ្វើសកម្មភាពឃោសនាច្រើនជាងគេ ក្នុងចំណោមគណបក្សទាំង៤ ដែលបានចូលរួមការប្រកួតប្រជែងបោះឆ្នោតព្រឹទ្ធសភា។

ពិធីបេីកយុទ្ធនាការឃោសនាបោះឆ្នោតជ្រេីសតាំងសមាជិកព្រឹទ្ធសភា នីតិកាលទី៤ ឆ្នាំ២០១៨ របស់ CPP នៅភូមិភាគ៣ ខេត្តកណ្តាល។ រូបថត៖ ហ្វេសប៊ុក CPP

លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប បានឲ្យដឹងថា គណបក្សនយោបាយបានធ្វើសកម្មភាពឃោសនាបោះឆ្នោត ស្របតាមច្បាប់។ ក្នុងនោះ គណបក្សប្រជាជនកម្ពុជា នៅខេត្តតាកែវ ដែលជាភូមិភាគទី៥ បានចេញឃោសនាទ្រង់ទ្រាយធំ ដោយការដង្ហែក្បួនឃោសនាតាមផ្លូវ។ ក្រៅពីនោះ គណបក្សប្រជាជនកម្ពុជា ក៏បានជួបប្រជុំ ផ្សព្វផ្សាយ ចែកខិតបណ្ណ បង្ហាត់អ្នកបោះឆ្នោតគូសសន្លឹកឆ្នោត ចាក់មេក្រូឃោសនាពីកម្មវិធី/គោលនយោបាយ តាមទីស្នាក់ការគណបក្សទូទាំងប្រទេស។

លោក ឌឹម សុវណ្ណារុំ បន្តថា ដោយឡែក គណបក្សហ៊្វុនស៊ិនប៉ិច នៅថ្ងៃទី១នៃយុទ្ធនាការឃោសនាបោះឆ្នោត ក៏បានចូលរួមយុទ្ធនាការឃោសនាបោះឆ្នោតព្រឹទ្ធសភា ដោយចាក់មេក្រូ បង្ហាញពីសារនយោបាយរបស់ខ្លួន នៅតាមទីស្នាក់ការមួយចំនួន។ រីឯគណបក្សយុវជនកម្ពុជា និងគណបក្សខ្មែររួបរួមជាតិ មិនទាន់មានសកម្មភាពឃោសនានៅឡើយទេ។

លោក ឌឹម សុវណ្ណារុំ ក្នុងកិច្ចប្រជុំរបស់ គ.ជ.ប នាពេលកន្លងមក

លោក ឌឹម សុវណ្ណារុំ បានបញ្ជាក់ថា «គ.ជ.ប បានវាយតម្លៃថា នៅថ្ងៃទី១ នៃយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ នាថ្ងៃទី១០ ខែកុម្ភៈ ឆ្នាំ២០១៨ គឺដំណើរការឃោសនាបោះឆ្នោតនេះ បានប្រព្រឹត្តទៅដោយស្ងប់ស្ងៀម ស្ថិរភាព និងមិនមានអំពើហិង្សាណាមួយកើតឡើងទេ នៅទូទាំងប្រទេស»។

សូមជម្រាបថា យុទ្ធនាការឃោសនាបោះឆ្នោតព្រឹទ្ធសភា រយៈពេល ១៤ថ្ងៃ ចាប់ពីថ្ងៃទី១០-២៣ ខែកុម្ភៈ ឆ្នាំ២០១៨ ដោយគណបក្សនយោបាយ ដែលចូលរួមការបោះឆ្នោតព្រឹទ្ធសភា អាចហែក្បួនឃោសនាបោះឆ្នោត បាន ២ដង នៅតាមភូមិភាគនីមួយៗ។ ក្រៅពីនោះ គណបក្សនយោបាយ ក៏អាចជួបជុំ ចាក់មេក្រូ និងចែកខិតបណ្ណឃោសនាដល់អង្គបោះឆ្នោតផងដែរ៕

អត្ថបទ៖ លីហៀង