គ.ជ.ប មិនទទួលបានបណ្តឹងតវ៉ាអ្វីមួយសោះ ពាក់ព័ន្ធនឹងការបោះឆ្នោតព្រឹទ្ធសភា

2018-02-26 12:20:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រតិទិននៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ឆ្នាំ២០១៨ ចេញផ្សាយដោយគណៈកម្មាធិការជាតិរៀបចំការបោះឆ្នោត (គ.ជ.ប) បង្ហាញថា ការប្តឹងជំទាស់ ឬតវ៉ាទៅគណៈកម្មាធិការខេត្តរាជធានី រៀបចំការបោះឆ្នោត (គធ.ខប) យ៉ាងយូរត្រឹមម៉ោង ១១ និង ៣០នាទី ព្រឹកថ្ងៃទី២៦ ខែកុម្ភៈ ឆ្នាំ២០១៨។ ក៏ប៉ុន្តែមកដល់រសៀលថ្ងៃទី២៦ ខែកុម្ភៈ ឆ្នាំ២០១៨ លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប បានមានប្រសាសន៍ថា គ.ជ.ប មិនបានទទួលបណ្តឹងណាមួយ ពាក់ព័ន្ធនឹងការរៀបចំការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ កាលពីថ្ងៃអាទិត្យ ទី២៥ ខែកុម្ភៈ ឆ្នាំ២០១៨ ឡើយ។

ទន្ទឹមនឹងនេះ បន្ទាប់ពីការបោះឆ្នោតចប់ កាលពីថ្ងៃទី២៥ ខែកុម្ភៈ និងបន្តដល់ថ្ងៃទី២៦ ខែកុម្ភៈ គណបក្សប្រជាជនកម្ពុជា គណបក្សយុវជនកម្ពុជា គណបក្សហ៊្វុនស៊ិនប៉ិច គណបក្សខ្មែររួបរួមជាតិ និងគណបក្សសញ្ជាតិកម្ពុជា បានថ្លែងការណ៍ផ្ទាល់មាត់ និងចេញសេចក្តីថ្លែងការណ៍ជាលាយលក្ខណ៍អក្សរ ប្រកាសស្វាគមន៍ គាំទ្រ និងទទួលយកលទ្ធផលបោះឆ្នោតព្រឹទ្ធសភា នីតិកាលទី៤។

ប្រតិទិនរបស់ គ.ជ.ប ក៏បានបង្ហាញថា ការប្រកាសផ្សាយលទ្ធផលបណ្តោះអាសន្ននៃការបោះឆ្នោតតាមមណ្ឌលភូមិភាគដោយ គ.ជ.ប នឹងធ្វើឡើង ពីថ្ងៃទី២៧ ខែកុម្ភៈ ដល់ថ្ងៃទី៣ ខែមីនា ឆ្នាំ២០១៨។ ដោយឡែក ការប្រកាសលទ្ធផលផ្លូវការ ការបែងចែកអាសនៈ និងប្រកាសផ្សាយបញ្ជីបេក្ខជនជាប់ឆ្នោត នឹងត្រូវ គ.ជ.ប ប្រកាសចន្លោះពីថ្ងៃទី៣ ខែមីនា ដល់ថ្ងៃទី៣ ខែមេសា ឆ្នាំ២០១៨។

សូមជម្រាបថា លទ្ធផលបណ្តោះអាសន្ននៃការបោះឆ្នោតព្រឹទ្ធសភា នីតិកាលទី៤ គ.ជ.ប ប្រកាសថា តាមភូមិភាគទាំង៨ គឺគណបក្សប្រជាជនកម្ពុជា ទទួលបានសំឡេងឆ្នោតច្រើនលើសលប់ ហើយបើតាមសំឡេងឆ្នោតនេះ គឺគណបក្សប្រជាជនកម្ពុជាតែមួយប៉ុណ្ណោះ នឹងទទួលបានអាសនៈព្រឹទ្ធសភា នៅគ្រប់ភូមិភាគនីមួយៗ ដែលមានចំនួន ៥៨អាសនៈ។ ដោយឡែក គណបក្ស ៣ ផ្សេងទៀត គឺគណបក្សយុវជនកម្ពុជា គណបក្សខ្មែររួបរួមជាតិ និងគណបក្សហ៊្វុនស៊ិនប៉ិច ទោះបីជាទទួលបានសំឡេងឆ្នោតខ្លះមែន តែមិនគ្រប់ចំនួនសំឡេង ដែលត្រូវទទួលបានអាសនៈតាមភូមិភាគនីមួយៗឡើយ។

ព្រឹទ្ធសភា នីតិកាលទី៤ មានសមាជិកសរុប ៦២ អាសនៈ ក្នុងនោះ ៥៨ អាសនៈ ត្រូវបោះឆ្នោតជ្រើសតាំងដោយសមាជិករដ្ឋសភា ( អ្នកតំណាងរាស្ត្រ ) និងសមាជិកក្រុមប្រឹក្សាឃុំសង្កាត់។ រីឯព្រះមហាក្សត្រ តែងតាំង ២អាសនៈ និងជ្រើសតាំងដោយរដ្ឋសភា ២អាសនៈទៀត៕

អត្ថបទ៖ លីហៀង