បុរាណវិទូអេហ្ស៊ីប រកឃើញទីកប់ខ្មោចសម័យបុរាណ មានអាយុកាលរាប់ពាន់ឆ្នាំ

2018-02-27 03:59:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកបុរាណវិទូអេហ្ស៊ីប បានរកឃើញវាលកប់ខ្មោចបុរាណមួយកន្លែង ដែលមានក្ដារមឈូសបុរាណចំនួន ៤០ រួមទាំងរូបចម្លាក់តូចៗប្រមាណជាង១០០ និងខ្សែកមួយខ្សែ ដែលមានអក្សរ "Happy New Year"។

លោក Khaled El-Enany រដ្ឋមន្ត្រីផ្នែកវត្ថុបុរាណអេហ្ស៊ីប បានថ្លែងកាលពីថ្ងៃ ២៤ កុម្ភៈថា វាលកប់ខ្មោចបុរាណនេះត្រូវបានគេប្រទះឃើញ នៅក្បែរតំបន់ Tuna al-Gabal ភាគខាងត្បូងទីក្រុង Cairo ប្រទេសអេហ្ស៊ីប។ វាមានអាយុកាលជាង២០០០ឆ្នាំ គឺរាប់ចាប់ពីរជ្ជកាលស្ដេចផារ៉ាអុងចុងក្រោយ ក្នុងឆ្នាំ៣០២មុនគ្រិស្តសករាជមកម្ល៉េះ។ លោក បានបន្តថា៖ "ឆាប់ៗនេះ យើងនឹងបន្ថែមនូវទីតាំងបុរាណមួយបន្ថែមទៀតដើម្បីទាក់ទាញភ្ញៀវទេសចរមកកាន់ភាគកណ្ដាលប្រទេសអេហ្ស៊ីប"។

លើសពីនេះ លោក Mostafa Waziri អគ្គលេខាធិការក្រុមប្រឹក្សាកំពូលផ្នែកវត្ថុបុរាណ បានថ្លែងថា ការជីកកកាយ គ្រោងនឹងធ្វើឡើង៥ឆ្នាំបន្ថែមទៀត ដើម្បីរុករកកន្លែងបញ្ចុះសពទាំងអស់ក្នុងតំបន់នេះ។ លោកបានបន្តទៀតថា រយៈពេល៣ខែកន្លងទៅនេះ ក្រុមរុករក បានរកឃើញនូវផ្នូរបុរាណ និងកន្លែងបញ្ចុះសពជាច្រើន ដែលជារបស់ពួកអ្នកបព្វជិតក្នុងរាជ្យអាទិទេព Thoth របស់ពួកអេហ្ស៊ីបបុរាណ។

អាជ្ញាធរ សង្ឃឹមថាការរកឃើញថ្មីនេះ នឹងអាចជួយទាក់ទាញភ្ញៀវទេសចរបន្ថែមទៀតដើម្បីពន្លឿននៃវិស័យទេសចរណ៍ ដែលត្រូវបានធ្លាក់ចុះ ក្រោយពីទម្លាក់អតីតប្រធានាធិបតី Hosni Mubarak កាលពីឆ្នាំ២០១១ មក។ ចំនួនអ្នកទេសចរក្នុងឆ្នាំ២០១៧ មានចំនួនជាង ៨លាននាក់ កើនឡើង ៥៤% បើធៀបឆ្នាំ២០១៦ តែនៅទាបជាងឆ្នាំ២០១០ ដែលមានចំនួន១៤,៧លាននាក់៕

ប្រភព៖ Sky News ប្រែសម្រួល៖ អឹុម ម៉េងស៊ាង