ដឹងពីខេត្តដែលត្រូវរៀបចំបុណ្យទន្លេ នៅឆ្នាំក្រោយហើយ

2018-03-11 01:55:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានប្រកាសថា បុណ្យទន្លេលើកទី៥ នៅឆ្នាំ២០១៩ នឹងត្រូវធ្វើឡើងនៅខេត្តកំពង់ឆ្នាំងដែលជាខេត្ត១នៅជាប់ទន្លេសាប។ ការប្រកាសនេះ ធ្វើឡើងក្នុងអំឡុងពេលដែលសម្តេច បានអញ្ជើញធ្វើជាអធិបតីក្នុងពិធីបើកបុណ្យទន្លេលើកទី៤ នៅក្រុងតាខ្មៅ ខេត្តកណ្តាល កាលពីថ្ងៃទី១០ ខែមីនា ឆ្នាំ២០១៨។

សម្តេច ហ៊ុន សែន ក្នុងពិធីបើកបុណ្យទន្លេលើកទី៤ នៅក្រុងតាខ្មៅ។ រូបថត៖ ហ្វេសប៊ុកសម្តេច ហ៊ុន សែន

សម្តេច ហ៊ុន សែន បានអំពាវនាវឲ្យខេត្តផ្សេងៗទៀត ខិតខំប្រឹងប្រែងអភិវឌ្ឍ ដើម្បីត្រៀមខ្លួនទទួលរៀបចំបុណ្យទន្លេនាឆ្នាំបន្តបន្ទាប់ទៀត។ សម្តេចបន្តថា កម្ពុជាមានខេត្តជាច្រើននៅតាមដងទន្លេមេគង្គ ទន្លេសាប និងទន្លេបាសាក់ ហើយទន្លេទាំងអស់នេះ បានផ្តល់ផលប្រយោជន៍ជាច្រើនដល់ប្រជាពលរដ្ឋ។

ទន្ទឹមនឹងនេះ ប្រមុខរាជរដ្ឋាភិបាល ក៏បានជំរុញឲ្យអាជ្ញាធរខេត្តនីមួយៗត្រូវបន្តយកចិត្តទុកដាក់ និងថែរក្សាចំពោះទន្លេ ជាពិសេសខេត្តណាដែលមានទន្លេ ឬបឹងបួរ គឺត្រូវតែចូលរួមថែរក្សា ការពារកុំឲ្យមានករណីបាក់ច្រាំងទន្លេជាដើម។

គួរបញ្ជាក់ថា ខេត្តដែលធ្លាប់រៀបចំបុណ្យទន្លេរួមមាន ខេត្តកំពង់ចាម ស្ទឹងត្រែង ក្រចេះ និងខេត្តកណ្តាលដែលកំពុងតែរៀបចំពិធីបុណ្យនេះ។

ពីធីបុណ្យទន្លេ ត្រូវបានបង្កើតឡើងដើម្បីជំរុញឲ្យមានការតភ្ជាប់មហាអនុតំបន់ទន្លេមេគង្គ និងបង្កើតកិច្ចសហប្រតិបត្តិការ ជាមួយប្រទេសជាសមាជិកទន្លេមេគង្គលើឆាកអន្តរជាតិ។ បន្ថែមពីនេះ ក៏ផ្ដោតលើការបង្កើតផលិតផលថ្មីៗឲ្យបានច្រើន ដើម្បីទាក់ទាញភ្ញៀវទេសចរជាតិ និងអន្តរជាតិមកកម្សាន្ត និងបានផ្សព្វផ្សាយពីវប្បធម៌ អរិយធម៌ ទំនៀមទម្លាប់ប្រពៃណីខ្មែរផងដែរ៕