លោក ម៉ម សូណង់ដូ ត្រូវបានជ្រើសរើសឲ្យធ្វើជាប្រធានគណបក្សសំបុកឃ្មុំម្តងទៀត

2018-03-11 03:57:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ម៉ម សូណង់ដូ ត្រូវបានសមាជវិសាមញ្ញគណបក្សសំបុកឃ្មុំសង្គមប្រជាធិបតេយ្យ នៅព្រឹកថ្ងៃទី១១ ខែមីនា ឆ្នាំ២០១៨នេះ បោះឆ្នោតឲ្យធ្វើជាប្រធានគណបក្សម្តងទៀត។ សមាជវិសាមញ្ញនេះ ធ្វើនៅភូមិទួលត្នោត ឃុំគគីរ ស្រុកគៀនស្វាយ ខេត្តកណ្តាល ដោយមានសមាជិកមកពីតាមបណ្តាខេត្តចូលរួមប្រមាណជាង ៣០០នាក់។

លោក ម៉ម សូណង់ដូ

សូមរម្លឹកថា លោក ម៉ម សូណង់ដូ បានលាលែងពីប្រធានគណបក្សនេះ កាលពីថ្ងៃទី០៤ ខែកញ្ញា ឆ្នាំ២០១៧ ក្រោយទទួលលទ្ធផលមិនល្អក្នុងការបោះឆ្នោតក្រុមប្រឹក្សាឃុំសង្កាត់ កាលពីខែមិថុនា ឆ្នាំ២០១៧។ ប៉ុន្តែកាលពីពេលថ្មីៗនេះ លោកបានសម្រេចចិត្តវិលមកចូលប្រឡូកក្នុងឆាកនយោបាយវិញ ដើម្បីដឹកនាំគណបក្សនេះ ចូលរួមក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។

លោក ម៉ម សូណង់ដូ ធ្លាប់បានលើកឡើងថា ការវិលចូលក្នុងឆាកនយោបាយវិញនេះ គឺបន្ទាប់ពីគណបក្សសង្គ្រោះជាតិ ត្រូវបានរំលាយកាលពីខែវិច្ឆិកា ឆ្នាំ២០១៧ ហើយមានគណបក្សខ្លះទៀត ចង់មករួមរស់ជាមួយគណបក្សសំបុកឃ្មុំ។

សមាជនេះ ក៏បានបោះឆ្នោតជ្រើសរើសអនុប្រធានគណបក្ស២រូប គឺលោក ផាត់ ស៊ីកាន ទទួលបន្ទុកការងារចុះមូលដ្ឋាន និងលោក ហ៊ាង គឹមស្រឿន (អតីតអនុប្រធានទី១ គណបក្សមហាសាមគ្គីជាតិខ្មែរ) ទទួលបន្ទុកការងារនយោបាយ និងរដ្ឋបាល។ ចំណែកតំណែងអគ្គលេខាធិការគណបក្ស បានទៅលើលោក ឡាយ ណារិន។ ឯលោកស្រី ហួន ផាន់ណារី ត្រូវបានជ្រើសរើសឲ្យធ្វើជាអគ្គនាយកទំនាក់ទំនងសាធារណៈ៕