កូរ៉េខាងជើង ប្រកាសចូលរួមកីឡាអូឡាំពិកចំនួន២ទៀត

2018-04-02 23:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រឹត្តិការណ៍កីឡាអូឡាំពិកនៅក្នុងប្រទេសជប៉ុន និងចិន នឹងមានវត្តមានអត្តពលិករបស់កូរ៉េខាងជើ់ងចូលរួម។ នេះជាការលើកឡើងរបស់លោក Thomas Bach ប្រធានគណៈកម្មាធិការអូឡាំពិកអន្តរជាតិ កាលពីចុងសប្ដាហ៍មុន ក្រោយកិច្ចជំនួបជាមួយលោក គីម ជុងអ៊ុន មេដឹកនាំកូរ៉េខាងជើងនៅក្នុងទីក្រុងព្យុងយ៉ាង។

លោក Bach បានប្រាប់ឲ្យដឹងថា កូរ៉េខាងជើងនឹងចូលរួមអូឡាំពិករដូវក្ដៅឆ្នាំ២០២០ នៅទីក្រុងតូក្យូ ប្រទេសជប៉ុន និងអូឡាំពិករដូវរងាឆ្នាំ២០២២ នៅក្រុងប៉េកាំង ប្រទេសចិន។ "ការប្ដេជ្ញាចិត្តនេះគឺទទួលបានការគាំទ្រយ៉ាងពេញទំហឹងពីមេដឹកនាំកូរ៉េខាងជើង ក្នុងកិច្ចពិភាក្សាបើកចំហ និងមានផ្លែផ្កាមួយ ដែលខ្ញុំបាននិយាយជាមួយគាត់ (លោក គីម ជុងអ៊ុន)" លោក Bach ថ្លែងប្រាប់។

សូមរំលឹកថា កាលពីខែកុម្ភៈ ឆ្នាំ២០១៨កន្លងទៅ កូរ៉េខាងជើងក៏បានចូលរួមកីឡាអូឡាំពិករដូវរងាផងដែរ នៅក្នុងប្រទេសកូរ៉េខាងត្បូង។ លោក Bach បានបង្ហាញទស្សនៈចំពោះការចូលរួមនេះថា វាជានិមិត្តសញ្ញានៃសន្តិភាព និងជាការជួយកាត់បន្ថយភាពតានតឹងនៅក្នុងឧបទ្វីបកូរ៉េ៕

ប្រភព៖ Reuters ប្រែសម្រួល៖ ឈាង.