អាជ្ញាធរអប្សរា ធ្វើកំណាយលើទីតាំងបុរាណ១ មុនរៀបចំសាងសង់ផ្លូវ

2018-04-03 08:24:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរជាតិអប្សរា និងអង្គការមូលនិធិបុរាណវិទ្យានិងអភិវឌ្ឍន៍ (ADF) បានធ្វើកំណាយសង្គ្រោះលើទីតាំងបុរាណមួយកន្លែងនៅលើខ្នងភ្នំគូលែន។ គម្រោងកំណាយនេះបានចាប់ផ្តើមកាលពីថ្ងៃទី២៩ ខែមីនា ឆ្នាំ២០១៨ ដើម្បីឲ្យដឹងថាកន្លែងបុរាណដ្ឋាននោះ ជាកន្លែងអ្វីតាមការប្រទះឃើញថ្មបាយក្រៀមដែលផុសឡើង ហើយត្រូវចងក្រងទិន្នន័យពីបុរាណដ្ឋាននោះ រក្សាទុកជាឯកសារសម្រាប់សិក្សាទៅថ្ងៃក្រោយ មុននឹងចាប់ផ្តើមសាងសង់ផ្លូវឆ្លងកាត់លើកន្លែងនោះ។

មុនអនុវត្តគម្រោងសាងសង់ផ្លូវ អ្នកបុរាណវិទ្យាបានចុះសិក្សាអំពីផលប៉ះពាល់ដល់ផ្នែកវប្បធម៌ប្រវត្តិសាស្ត្រឃើញមានចំនួន ៤កន្លែង។ ក្នុងនោះ ៣ទីតាំង គេអាចសាងសង់ផ្លូវវាងបាន លើកលែងតែចំណុចដែលកំពុងធ្វើកំណាយសង្គ្រោះនេះ ជាទីតាំងដែលមិនអាចធ្វើផ្លូវវាងបាន។ ដូច្នេះហើយតាមការចុះទៅពិនិត្យផ្ទាល់ពីអ្នកជំនាញការអាដហុក និងអនុសាសន៍នៃគណៈកម្មការអាយស៊ីស៊ី-អង្គរឆ្នាំ២០១៧ បានសម្រេចឲ្យធ្វើកំណាយសង្គ្រោះសិន មុននឹងធ្វើការសាងសង់ផ្លូវថ្មីនេះ ដើម្បីធ្វើយ៉ាងណាបញ្ចៀសនូវផលប៉ះពាល់ឲ្យបានជាអតិបរមា។

ជុំវិញការសាងសង់ផ្លូវខាងលើ លោក ឈាន រដ្ឋា ប្រធានស្តីទីនាយកដ្ឋានអភិរក្សប្រាសាទក្រៅឧទ្យានបានឲ្យដឹងថា គម្រោងសាងសង់ផ្លូវនេះត្រូវបានអ្នកជំនាញសិក្សាតាំងពីឆ្នាំ២០១៦មកម្ល៉េះ ហើយទើបនឹងចាប់ផ្ដើមសាងសង់នៅដើមឆ្នាំ ២០១៨នេះ។ ចំពោះផ្លូវដែលកំពុងស្ថាបនានេះ មានប្រវែង ៣២គីឡូម៉ែត្រ ទទឹង៦ម៉ែត្រ ដោយគិតចាប់ពីជើងភ្នំស្រុកបន្ទាយស្រី មកដល់ទីប្រជុំជនស្រុកស្វាយ ដែលត្រូវបានប្រើប្រាស់ថវិការបស់មូលនិធិអភិរក្សនិងអភិវឌ្ឍតំបន់អង្គរ។ ចំពោះការសាងសង់ផ្លូវទៀតសោត គឺសាងសង់នៅលើផ្លូវចាស់ដែលមានស្រាប់ ពោលគឺផ្លូវដែលប្រជាពលរដ្ឋរស់នៅលើខ្នងភ្នំគូលែន ប្រើប្រាស់តាំងពីយូរយារណាស់មកហើយ៕