កីឡាករម្នាក់អះអាងថា ខ្លួននឹងប្រជែងពានរង្វាន់ស្បែកជើងមាសពី Salah

2018-04-09 07:17:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែប្រយុទ្ធ Mohammed Salah កំពុងនាំមុខគេ និងជាបេក្ខភាពឈ្នះស្បែកជើងមាស ក្នុងបញ្ជីកីឡាករដែលរកគ្រាប់បានច្រើនជាងគេ នៅក្របខ័ណ្ឌ English Premier League រដូវកាល២០១៧-១៨នេះ ប៉ុន្តែខ្សែប្រយុទ្ធ Harry Kane បានប្ដេជ្ញាដណ្ដើមពានរង្វាន់នេះពីកីឡាកររបស់ Liverpool ឲ្យបាន។

Kane និង Salah (រូបភាព៖ Premier League)

**«ខ្ញុំជឿជាក់លើខ្លួនខ្ញុំ ថាអាចធ្វើវាបាន... នៅសល់ការប្រកួតច្រើនទៀត ដូច្នេះខ្ញុំនឹងផ្ដោតទៅលើការប្រកួតដែលនៅសល់ ប៉ុន្តែខ្ញុំមិនអាចហាមឃាត់គេ (Salah ពីការលេងដ៏ល្អ និងរកគ្រាប់បាល់) បានទេ»**។ នេះជាសម្ដីរបស់ Harry Kane ។

ក្របខ័ណ្ឌ Premier League នៅសល់ចំនួន ៦ប្រកួតទៀតមុនបញ្ចប់រដូវកាល ហើយ Kane របស់ក្លឹប Tottenham Hotspur មានសង្ឃឹមយ៉ាងមោះមុត ដើម្បីក្លាយជាអ្នកស៊ុតបញ្ចូលទីច្រើនជាងគេ។ បច្ចុប្បន្ន Kane រកបាន ២៤គ្រាប់ ខណៈ Salah មាន ២៩គ្រាប់ ប៉ុន្តែ Spurs នៅសល់ ៦ប្រកួតក្នុងដៃ ស្របពេល Liverpool សល់តែ ៥ប្រកួតប៉ុណ្ណោះ។

Kane ដែលមានសញ្ជាតិអង់គ្លេស គឺជាអតីតអ្នកស៊ុតបញ្ចូលទីច្រើនជាងគេ កាលពី២រដូវកាលកន្លងទៅ។ ប្រសិនបើកីឡាកររូបនេះ អាចស៊ុតបញ្ចូលទីច្រើនជាងគេក្នុងរដូវកាលនេះទៀត នោះ Kane នឹងតាមស្មើកំណត់ត្រារបស់អតីតខ្សែប្រយុទ្ធ Thierry Henry របស់ Arsenal ដែលឈ្នះស្បែកជើងមាស ៣រដូវកាលជាប់ៗគ្នា ចន្លោះពីឆ្នាំ២០០៣ ដល់ ២០០៦៕

ប្រភព៖ ESPN FC ប្រែសម្រួល៖ លាភ.