ឈើគគីរ សម្រាប់ធ្វើទូក ង វែងបំផុតក្នុងលោក ត្រូវបានដឹកមកដល់ខេត្តព្រៃវែងហើយ

2018-04-13 10:28:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឈើគគីរ សម្រាប់ធ្វើទូក ង ប្រវែង ៨៥ម៉ែត្រ ទទឹង ១,៥៥ម៉ែត្រ ដើម្បីបំបែកកំណត់ត្រាពិភពលោក ត្រូវបានដឹកយកមកដល់ទីតាំងហើយ គឺនៅមុខសាលាខេត្តព្រៃវែង នៅថ្ងៃទី១៣ ខែមេសានេះ។

លោក ស សុខា អនុប្រធានសហភាពសហព័ន្ធយុវជនកម្ពុជា និងជាតំណាងរាស្ត្រមណ្ឌលព្រៃវែង ដែលបានទៅដល់ទីតាំងធ្វើទូក ដើម្បីពិនិត្យមើលឈើគគីរទាំងនោះ បានមានប្រសាសន៍ថា ឈើគគីរសម្រាប់ធ្វើទូក ង នេះ គឺដឹកពីកន្លែងផ្សេងៗគ្នា។ លោកបញ្ជាក់ទៀតថា ការធ្វើទូក ង តាមរចនាប័ទខ្មែរនេះ គឺដើម្បីបង្ហាញពីស្នាដៃរបស់ខ្មែរ ពីការធ្វើទូកដែលមានប្រវែងវែងជាងគេ ដើម្បីបំបែកកំណត់ត្រាពិភពលោក។

សូមបញ្ជាក់ថា ការធ្វើទូក ង នេះ នឹងបើកឲ្យប្រជាពលរដ្ឋចូលរួមធ្វើ ចាប់ពីថ្ងៃទី១៤ ខែមេសាតទៅ ហើយរំពឹងថានឹងរួចរាល់ នៅថ្ងៃទី៣០ ខែឧសភា ឆ្នាំ២០១៨។ ឈើគគីរ ដែលយកមកធ្វើទូកនេះ គឺមានចំនួន ៣ដើម ដែលក្នុងមួយដើមៗ មានប្រវែងជាមធ្យម ជាង ៣០ម៉ែត្រ។

នៅពេលធ្វើរួចរាល់ ទូក ង ដែលអាចផ្ទុកអ្នកចែវ បាន ១៧៩នាក់នេះ នឹងត្រូវហែចុះទន្លេ ដែលគេប៉ាន់ស្មានថា នឹងប្រើកម្លាំងមនុស្ស មិនតិចជាង ១០០០នាក់ទេ ដើម្បីសែង។ បន្ថែមលើនេះ សារៈមន្ទីរសម្រាប់តម្កល់ទូក និងឯកសារផ្សេងៗ នឹងត្រូវបង្កើតឡើង ដើម្បីឲ្យប្រជាពលរដ្ឋ និងភ្ញៀវអន្តរជាតិ បានចូលទស្សនា៕