ចាន់ វឌ្ឍនាកា ត្រៀមខ្លួនឆ្លើយតបនឹងការចង់បានរបស់គ្រូបង្វឹក Pahang

2018-04-19 03:39:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាកររបស់កម្ពុជា ចាន់ វឌ្ឍនាកា បានអះអាងថា ខ្លួននឹងព្យាយាមបន្ថែមទៀត ក្នុងការលេងឲ្យក្លឹបបាល់ទាត់ Pahang FA នៅក្នុងការប្រកួតទល់នឹងក្រុមខ្លាំង Johor Darul Ta'zim (JDT) ជើងទីពីរ វគ្គ៨ក្រុមចុងក្រោយ ពានរង្វាន់ FA Cup ម៉ាឡេស៊ី នៅថ្ងៃទី២០ ខែមេសា វេលាម៉ោង៨យប់។ នេះបើតាមសារព័ត៌មាន Fox Sports Asia ។

ចាន់ វឌ្ឍនាកា កំពុងហ្វឹកហាត់ជាមួយមិត្តរួមក្រុម ត្រៀមប៉ះ JDT នៅកីឡដ្ឋាន Larkin (រូបភាព៖ Pahang FA)

វឌ្ឍនាកា បានប្រាប់ដល់ភ្នាក់ងារសារព័ត៌មានខាងលើថា គេអាចធ្វើបានល្អជាងនេះ និងមានបំណងរកគ្រាប់បាល់ឲ្យបានសម្រាប់ក្រុម Pahang។ កីឡាករដដែលបន្តថា ប្រសិនបើខ្លួនអាចធ្វើដូច្នេះបាន នោះការលេងរបស់គេនឹងមានការរីកចម្រើន។

ប្រភពដដែលបន្តថា គ្រូបង្វឹករបស់ Pahang គឺលោក Dollah Salleh ចង់ឲ្យ វឌ្ឍនាកា ខំប្រឹងបន្ថែមទៀត បន្ទាប់ពីតារាបាល់ទាត់មកពីខេត្តកំពតរូបនេះ បានចូលរួមជាមួយក្រុមរបស់លោករយៈពេលជិត៥ខែមកហើយ។

ចាន់ វឌ្ឍនាកា នឹងក្លាយជាតួសំខាន់ក្នុងការប្រកួតនៅកីឡដ្ឋាន Larkin ដោយសារតែកីឡាករសំខាន់ៗដូចជា ខ្សែប្រយុទ្ធ Forkey Doe និង ខ្សែការពារ Matthew Davies សុទ្ធតែមានបញ្ហារបួស។ កាលពីជើងទីមួយ Pahang បានត្រឹមលទ្ធផលស្មើ ០-០ ជាមួយ JDT តែប៉ុណ្ណោះ៕

អត្ថបទ៖ លាភ.