កុលាលភាជន៍ផលិតក្នុងសម័យអង្គរ ជាង៦០ ត្រូវប្រគល់ជូនខ្មែរវិញហើយ

2018-04-30 06:21:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កុលាលភាជន៍ចំនួន ៥កេស ស្មើចំនួន៦៤វត្ថុ មានដូចជា ចាន ក្រឡ ដន្លាប់ ខួច មានស្រទាប់រលោងពណ៌បៃតងនិងពណ៌ត្នោត ត្រូវបានប្រគល់ជូនអាជ្ញាធរជាតិអប្សរាដោយវិទ្យាស្ថាន Smitsonian តាមរយៈស្ថានទូតសហរដ្ឋអាមេរិក ដើម្បីរក្សាទុក អភិរក្ស និងសិក្សា។ កុលាលភាជន៍ទាំងនេះ ត្រូវផលិតនៅសម័យអង្គរ មានប្រភពមកពីខេត្តបុរីរម្យ ប្រទេសថៃ នាពេលបច្ចុប្បន្ន។

កុលាលភាជន៍ចំនួន ៥កេស ស្មើចំនួន៦៤វត្ថុ មានដូចជា ចាន ក្រឡ ដន្លាប់ ខួច

លោក អ៊ា ដារិទ្ធ អនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរ បានឲ្យដឹងថា ប្រវត្តិនៃវត្ថុខាងលើ ត្រូវបានអ្នកស្រឡាញ់វត្ថុបុរាណជនជាតិជប៉ុន និងអាមេរិកប្រមូលទិញពីខេត្តបុរីរម្យយកទៅសហរដ្ឋអាមេរិកក្នុងទសវត្សឆ្នាំ១៩៧០ ហើយបន្ទាប់មកបានប្រគល់ជូនវិទ្យាស្ថាន Smithsonian ។ ដោយមានកិច្ចសហការល្អជាមួយអាជ្ញាធរជាតិអប្សរា វិទ្យាស្ថាន Smithsonian ក៏បានប្រគល់កុលាលភាជន៍ទាំងនេះ ឲ្យអង្គភាពកុលាលភាជន៍អង្គរជាអ្នកមើលការខុសត្រូវ។

ចំពោះភាជន៍មួយចំនួនដែលល្អៗ អាជ្ញាធរជាតិអប្សរានឹងយកទៅតាំងពិព័រណ៌បង្ហាញជាសាធារណៈ ព្រោះអាជ្ញាធរជាតិអប្សរាមានគម្រោងតាំងពិព័រណ៌វត្ថុបុរាណដែលស្រាវជ្រាវបានជាង២០ឆ្នាំពីតំបន់អង្គរ។ លើសពីនោះ វត្ថុទាំងនោះនឹងត្រូវរក្សាទុកដើម្បីសិក្សាប្រៀបធៀបពីសម័យកាល បច្ចេកទេស និងគុណភាព រវាងកុលាលភាជន៍ដែលមានប្រភពពីបុរីរម្យ និងតំបន់អង្គរ ព្រោះកុលាលភាជន៍អាចឆ្លុះបញ្ចាំងពីសម័យកាលមួយនៃប្រវត្តិសាស្ត្រខ្មែរ និងបង្ហាញពីជីវភាពរស់នៅរបស់ប្រជាជនសម័យអង្គរ។

អ្នកជំនាញ រៀបចំយកកុលាលភាជន៍ ចេញពីកេស

គួររំឭកថា ពិធីប្រគល់កុលាលភាជន៍នេះ ប្រព្រឹត្តទៅនៅស្ថានទូតអាមេរិក កាលពីថ្ងៃទី០២ ខែមេសា ឆ្នាំ២០១៨ រវាងលោក អ៊ា ដារិទ្ធ និងលោក ធី សេរីវុឌ្ឍ (តំណាងអាជ្ញាធរជាតិអប្សរា) និងលោកស្រី Monica Davis (តំណាងស្ថានទូតអាមេរិក)។

នាសម័យបុរាណ ភាជន៍ត្រូវបានគេប្រើប្រាស់ប្រចាំថ្ងៃ ធ្វើជាគ្រឿងតាំងលម្អក្នុងផ្ទះ និងសម្រាប់ប្រើក្នុងពិធីសាសនាផ្សេងៗ ដូចជាពិធីសែនព្រេន និងបួងសួងជាដើម។

ក្រៅពីបានប្រគល់កុលាលភាជន៍ដ៏ច្រើន វិទ្យាស្ថាន Smithsonian ក៏បានផ្តល់ជូននូវសម្ភារៈមួយចំនួនដូចជា ម៉ាស៊ីនមីក្រូទស្សន៍ សម្ភារៈមន្ទីរពិសោធន៍ និងសៀវភៅស្តីពីការវិភាគថ្ម និងកុលាលភាជន៍ផងដែរ៕