៣ខែហើយ បេសកកម្មថ្មីនៃការរុករកយន្តហោះ MH370 នៅតែគ្មានពន្លឺ

2018-05-01 04:15:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បេសកកម្មថ្មីនៃការរុករកយន្តហោះម៉ាឡេស៊ីអ៊ែឡាញ MH370 នៅបាតសមុទ្ទឥណ្ឌា ដែលចាប់ផ្តើមតាំងពីចុងខែមករាមកនោះ នៅមិនទាន់ទទួលបានលទ្ធផលអ្វីសោះឡើយ បើទោះជាក្រុមអ្នកស្រាវជ្រាវ បានរុករកក្នុងទំហំដីរហូតដល់ ៨ម៉ឺនគីឡូម៉ែត្រការ៉េហើយក៏ដោយ។

កាលពីយប់ថ្ងៃចន្ទម្សិលមិញ ក្រុមហ៊ុនអាម៉េរិក័ង Ocean Infinity ដែលមានភារកិច្ចរុករកយន្តហោះ MH370 បានចេញរបាយការណ៍មួយដោយនិយាយថា ខ្លួនបានប្រឹងប្រែងរុករកយន្តហោះនេះ រហូតដល់១៣០០គីឡូម៉ែត្រការ៉េក្នុងមួយថ្ងៃ ប៉ុន្តែអ្នកស្រាវជ្រាវមិនបានជួបប្រទះអ្វីសោះ ចាប់តាំងពីពេលបើកកិច្ចប្រត្តិបត្តិការនៅចុងខែមករាមក។

នាវារុករកយន្តហោះ MH 370 របស់ក្រុមហ៊ុន Ocean Infinity (រូបថត៖ ក្រុមហ៊ុន Ocean Infinity)

ខណៈដែលលទ្ធផលបង្ហាញនូវក្តីអស់សង្ឃឹម លោក Oliver Plunkett នាយកប្រតិបត្តិក្រុមហ៊ុន Ocean Infinity ថ្លែងថាក្រុមហ៊ុនលោក នៅតែប្តេជ្ញាចិត្តខ្ពស់ក្នុងការស្វែងរកយន្តហោះ នៅក្នុងទីតាំងដែលនៅសល់។

ជុំវិញការស្វែងរកយន្តហោះនេះ ប្រទេសម៉ាឡេស៊ីបានសម្រេចពន្យារពេលរហូតដល់ ពាក់កណ្តាលខែមិថុនា។

សូមរំលឹកថា យន្តហោះ MH370 បានបាត់ខ្លួននៅថ្ងៃទី ៨មីនា ឆ្នាំ២០១៤ ខណៈដែលវាកំពុងហោះហើរពីទីក្រុងកូឡាឡាំពួរ ទៅទីក្រុងប៉េកាំង ដោយផ្ទុកមនុស្ស២៣៩នាក់នៅលើយន្តហោះ៕

ប្រភព៖ Khaosod English ប្រែសម្រួល៖ ឃុត សុខឿន