គណបក្សសំបុកឃ្មុំ ឈរឈ្មោះ២៥ ខេត្ត-រាជធានី ដាក់បេក្ខជនលេខរៀងទី១ ជាស្រ្ដី ១៤ខេត្ត

2018-05-11 07:30:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សសំបុកឃ្មុំសង្គមប្រជាធិបតេយ្យ បានដាក់បញ្ជីបេក្ខជនឈរឈ្មោះ ក្នុងការបោះឆ្នោតជ្រើសតាំងតំណាងរាស្រ្ដ នីតិកាលទី ៦ ឆ្នាំ២០១៨ ទូទាំង ២៥ ខេត្ត-រាជធានី។ លោកម៉ម សូណង់ដូ ប្រធានគណបក្សនេះ បានថ្លែងប្រាប់ខ្លីៗ នៅព្រឹកថ្ងៃទី ១១ ខែឧសភា នេះថា ក្នុងចំណោម ២៥ ខេត្ត-រាជធានីនោះ មានបេក្ខជនជាស្រ្ដី ឈរឈ្មោះនៅលំដាប់លេខរៀងទី១ ចំនួន ១៤ខេត្ត ខណៈបេក្ខជនជាបុរស ឈរនៅលេខរៀងទី១ មានតែចំនួន ១១ ខេត្ត-រាជធានីប៉ុណ្ណោះ។

លោកម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ

លោកម៉ម សូណង់ដូ បានបញ្ជាក់ថា បេក្ខជនឈរឈ្មោះជាស្ត្រី លំដាប់លេខរៀងទី១ មាននៅខេត្តក្រចេះ ខេត្តឧត្តរមានជ័យ ប៉ៃលិន ស្ទឹងត្រែង កែប ព្រះសីហនុ រតនគីរី ព្រះវិហារ មណ្ឌលគីរី កោះកុង កំពត កំពង់ចាម បាត់ដំបង និងខេត្តបន្ទាយមានជ័យ។

បើគិតលើចំនួនបេក្ខជនសរុប ក៏ស្រ្ដីមានចំនួនច្រើនជាងបុរសផងដែរ ដែលក្នុងនោះ បេក្ខជនពេញសិទ្ធិ មានស្រ្ដី ៦៣នាក់ និងបុរស ៦២នាក់ ឯបេក្ខជនបម្រុង មានស្រ្ដី ៩២នាក់ និងបុរស ៤៩នាក់។

លោកម៉ម សូណង់ដូ ក៏បានបង្ហាញក្ដីសង្ឃឹមថា នៅក្នុងការបោះឆ្នោតនាពេលខាងមុខនេះ គណបក្សសំបុកឃ្មុំសង្គមប្រជាធិបតេយ្យ នឹងទទួលបានជោគជ័យ៕