លោក ខឹម វាសនា មិនឈរឈ្មោះបោះឆ្នោតនាខែកក្កដា ឆ្នាំ២០១៨ខាងមុខនេះទេ

2018-05-12 13:04:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ចិន ថុន អគ្គលេខាធិការគណបក្សសម្ព័ន្ធដើម្បីប្រជាធិបតេយ្យ (LDP) បានឲ្យដឹងថា នៅរសៀលថ្ងៃទី១២ ខែឧសភា ឆ្នាំ២០១៨ LDP បានដាក់បញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះនៅគណៈកម្មាធិការជាតិរៀបចំការបោះឆ្នោត (គ.ជ.ប)។ ក្នុងនោះ គណបក្សបានដាក់បេក្ខជនឈរឈ្មោះទាំង ២៥រាជធានី-ខេត្ត ប៉ុន្តែលោក ខឹម វាសនា ដែលជាប្រធានបក្ស មិនបានឈរឈ្មោះឡើយ។

លោក ខឹម វាសនា កំពុងផ្តល់បទសម្ភាសន៍ដល់អ្នកសារព័ត៌មាន ក្នុងអំឡុងពេលលោកចូលរួមបោះឆ្នោតឃុំសង្កាត់ឆ្នាំ២០១៧ នៅមណ្ឌលបោះឆ្នោត១កន្លែង ក្នុងរាជធានីភ្នំពេញ

គួររំលឹកថា ការមិនឈរឈ្មោះបោះឆ្នោតនេះ ត្រូវបានលោក ខឹម វាសនា ប្រកាសរួចមកហើយក្នុងវេទិកាសាធារណៈរបស់ LDP នៅទីស្នាក់ការកណ្តាលគណបក្ស ក្នុងខណ្ឌទួលគោក កាលពីខែធ្នូ ឆ្នាំ២០១៧ ដោយលោកចង់ទុកឱ្យសមាជិកជាអ្នកឈរឈ្មោះវិញ។ លោកបានបញ្ជាក់យ៉ាងដូច្នេះថា៖ «**អាណត្តិនេះ ភាគរយច្រើន ប្រហែលជាអត់ឈរឈ្មោះទេ ទុកឲ្យបងប្អូនឈរចុះ។ គេថាខ្ញុំចង់ធ្វើនាយករដ្ឋមន្ត្រី ខ្ញុំមិនធ្វើនាយករដ្ឋមន្ត្រីទេ ការងារច្រើនណាស់**»។

លោក ចិន ថុន បានឱ្យដឹងថា ក្នុងចំណោមបេក្ខជនឈរឈ្មោះទាំង២៥រាជធានី-ខេត្ត ក្នុងនោះបេក្ខជនពេញសិទ្ធិមានចំនួន ១២៥នាក់ និងបេក្ខជនបម្រុងមានចំនួន១៤៨នាក់ បេក្ខជនជាស្ត្រីមាន ២៥នាក់ និងបេក្ខជនជាយុវជនជាង៧០ភាគរយ។

សូមជម្រាបដែរថា គិតចាប់ពីថ្ងៃទី៣០ ខែមេសា រហូតមកដល់ត្រឹមថ្ងៃទី១២ ខែឧសភា គឺមានគណបក្សចំនួន១០ហើយ បានចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតនៅ គ.ជ.ប រួមមាន៖ ១.គណបក្សប្រជាជនកម្ពុជា ២.គណបក្សសញ្ជាតិកម្ពុជា ៣.គណបក្សយុវជនកម្ពុជា (គណបក្សទាំងបីនេះ ត្រូវបានគ.ជ.ប ទទួលស្គាល់ផ្លូវការហើយ)។ ៤.គណបក្សខ្មែររួបរួមជាតិ ៥.គណបក្សហ៊្វុនស៊ិនប៉ិច ៦.គណបក្សខ្មែរតែមួយ ៧.គណបក្សប្រជាធិបតេយ្យមូលដ្ឋាន ៨.គណបក្សសំបុកឃ្មុំសង្គមប្រជាធិបតេយ្យ ៩.គណបក្សពន្លឺថ្មី និង១០.គណបក្សសម្ព័ន្ធដើម្បីប្រជាធិបតេយ្យ៕

អត្ថបទ៖ សោភា