វៀតណាម ផ្ទុះកំហឹងនឹងទេសចរចិនរឿងពាក់អាវរូបផែនទី

2018-05-17 06:50:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកប្រើប្រាស់បណ្ដាញសង្គមនៅប្រទេសវៀតណាម បានផ្ទុះការខឹងសម្បានឹងភ្ញៀវទេសចរចិនមួយក្រុម ដែលបានពាក់អាវយឺត មានរូបផែនទីប្រទេសចិន ជាមួយខ្សែបន្ទាត់បង្ហាញពីសមុទ្រចិនខាងត្បូងជារបស់ចិន ដែលត្រូវបានគូរកាលពីទសវត្សរ៍ឆ្នាំ១៩៤០។ អ្នកលេងទាំងនោះ បានទាមទារឲ្យអាជ្ញាធរធ្វើការបណ្ដេញទេសចរទាំងនោះ ចេញពីប្រទេសវៀតណាម។

ក្រុមទេសចរចិនខាងលើ បានទៅដល់ព្រលានយន្តហោះ Cam Ranh កាលពីថ្ងៃអាទិត្យកន្លងទៅ ហើយត្រូវបានឃាត់ដោយសន្តិសុខ ដោយតម្រូវឲ្យដោះ ផ្លាស់អាវយឺតដែលមានរូបផែនទីនោះចេញ មុននឹងត្រូវអនុញ្ញាតឲ្យចាកចេញពីព្រលានយន្តហោះ។

ទេសចរម្នាក់ ពាក់អាវយឺតមានរូបផែនទីប្រទេសចិន ជាមួយខ្សែបន្ទាត់នៃសមុទ្រសមុទ្រចិនខាងត្បូង (រូបថត៖ South China Morning Post)

គួរជម្រាបថា វៀតណាម និងចិន បានមានទំនាស់នៅសមុទ្រចិនខាងត្បូង បន្ទាប់ពីក្រុងប៉េកាំង បង្កើតកោះសិប្បនិម្មិតមួយចំនួន និងបំពាក់ឧបករណ៍យោធាជាច្រើន នៅលើកោះទាំងនោះ នៅសមុទ្រចិនខាងត្បូង។

នេះមិនមែនជាលើកទីមួយទេ ដែលទេសចរចិនបានបង្កការខឹងសម្បានៅពីសំណាក់អ្នកលេងបណ្ដាញសង្គមនៅវៀតណាមដូច្នេះ។ កាលពីឆ្នាំ២០១៦ នៅព្រលានយន្តហោះហូជីមិញ ប្រទេសវៀតណាម ទេសចរចិនម្នាក់បានសរសេរអក្សរជាភាសាអង់គ្លេសថា "F*ck You” នៅក្នុងលិខិតឆ្លងដែន។ ជាមួយគ្នានេះ មន្ត្រីនៅកោះ Da Nang និង Phu Quoc (កោះត្រល់) ក៏ធ្លាប់បដិសេធ មិនបោះត្រាលើលិខិតឆ្លងដែនរបស់ទេសចរចិន ដែលមានផែនទីបង្ហាញពីតំបន់ជម្លោះនោះផងដែរ៕

ទេសចរចិនម្នាក់បានសរសេរអក្សរជាភាសាអង់គ្លេសថា "F*ck You” នៅក្នុងលិខិតឆ្លងដែន នៅពេលបោះត្រាលិខិតឆ្លងដែននៅព្រលានយន្តហោះហូជីមិញ កាលពីឆ្នាំ២០១៦ (រូបថត៖ South China Morning Post)

ប្រភព៖ South China Morning Post ប្រែសម្រួល៖ លាភ.