ចិន សម្រេចកាត់បន្ថយពន្ធនាំចូលលើយានយន្ត និងគ្រឿងបន្លាស់ហើយ

2018-05-23 04:04:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចិន បានសម្រេចចិត្តកាត់បន្ថយពន្ធនាំចូលលើយានយន្ត និងគ្រឿងបន្លាស់ ចាប់ពីថ្ងៃ០១ កក្កដា ឆ្នាំ២០១៨ នេះតទៅ។ នេះបើតាមការប្រកាសរបស់ក្រុមប្រឹក្សារដ្ឋចិន នៅក្នុងសេចក្ដីថ្លែងការណ៍មួយ កាលពីថ្ងៃទី២២ ឧសភាម្សិលមិញ។

ឡាននាំចូល ចតនៅកំពង់ផែ Qingdao, ខែត្រ Qingdao ប្រទេសចិន។ រូបភាព៖ VCG Photo‍

ក្នុងសេចក្តីថ្លែងការណ៍នេះ បានបញ្ជាក់ថា ក្រុងប៉េកាំង នឹងកាត់បន្ថយពន្ធនាំចូលលើយានយន្តចំនួន ១៣៩ ប្រភេទ មកត្រឹម ១៥% ដែលចុះពីពន្ធនាំចូលបច្ចុប្បន្ន ២០% និង២៥%។ រីឯ ពន្ធនាំចូលលើគ្រឿងបន្លាស់យានយន្តចំនួន ៧៩ ប្រភេទ នឹងត្រូវកាត់បន្ថយមកត្រឹម ៦ % ដែលចុះពីពន្ធនាំចូលបច្ចុប្បន្ន ៨% ១០% ១៥% ២០% និង២៥%។

ពន្ធជាមធ្យមលើការនាំចូលយានយន្ត នឹងកាត់បន្ថយពី២១,៥% មកត្រឹម១៣,៨% និងពន្ធជាមធ្យមលើការនាំចូលគ្រឿងបន្លាស់យានយន្ត នឹងធ្លាក់ពី១០,២% មកត្រឹម ៦%។

ជុំវិញរឿងនេះ អ្នកវិភាគ បានបកស្រាយថា ការបន្ធូរបន្ថយពន្ធនាំចូលនេះ នឹងផ្ដល់អត្ថប្រយោជន៍ទៅដល់ក្រុមហ៊ុនផលិតយានយន្តរបស់អាមេរិក រួមមានដូចជា Tesla ព្រមទាំងក្រុមហ៊ុនផលិតយានយន្តរបស់អាស៊ី និងអឺរ៉ុបផងដែរ។

បើយោងតាម Bloomberg ក្រុមហ៊ុនផលិតយានយន្តPorsche របស់អាល្លឺម៉ង់ ក៏បានស្វាគមន៍ការបន្ថយពន្ធរបស់ចិនផងដែរ និងត្រៀមរួចរាល់សម្រាប់កំណត់តម្លៃសម្រាប់ទីផ្សាររបស់ចិនទៀតផង៕

ប្រភព៖ CGTN ប្រែសម្រួល៖ អឹុម ម៉េងស៊ាង