បេក្ខជនម្នាក់ គ្រោងចូលដឹកនាំ Chelsea ជំនួសលោក Conte

2018-05-24 02:20:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Maurizio Sarri ដែលទើបតែចែកផ្លូវពីក្លឹប Napoli នៅអ៊ីតាលី ទំនងជាត្រូវចូលទៅដឹកនាំក្លឹបតោខៀវ Chelsea នៅអង់គ្លេស ដើម្បីជំនួសតំណែងលោក Antonio Conte ។ នេះជាការចុះផ្សាយរបស់សារព័ត៌មាន Goal នៅថ្ងៃទី២៤ ខែឧសភា ឆ្នាំ២០១៨នេះ។

លោក Maurizio Sarri ត្រូវបានប្រធានក្លឹប Napoli ថា លោកបានចែកផ្លូវពី Napoli ហើយ (រូបថត៖ EPA)

ប្រធានក្លឹប Napoli លោក Aurelio De Laurentiis បានបញ្ជាក់នៅលើបណ្ដាញសង្គម Twitter ពីការចែកផ្លូវរបស់លោក Sarri ដែលគេជឿថា លោកនឹងធ្វើដំណើរទៅកាន់ប្រទេសអង់គ្លេស។ គ្រូបង្វឹកសញ្ជាតិអ៊ីតាលីដដែល បានបរិសេធក្នុងការចុះកុងត្រាថ្មីជាមួយ Napoli ។

ចំណែក លោក Conte ក៏ត្រូវបានគេជឿថា លោកនឹងចែកផ្លូវពី Chelsea ផងដែរ បន្ទាប់ពីលោកមិនអាចជួយឲ្យក្រុមតោខៀវ បានលេងនៅពានរង្វាន់ UEFA Champions League រដូវកាលក្រោយ។ ទោះបីជាលោកជួយ Chelsea ឲ្យលើកពានរង្វាន់ FA Cup កាលពីចុងសប្ដាហ៍កន្លងទៅ ដោយយកឈ្នះក្រុម Manchester United ១-០ ក៏ដោយ ក៏ទំនាក់ទំនងរវាងលោក Conte និងថ្នាក់ដឹកនាំក្លឹប មិនមានភាពល្អប្រសើរឡើយ។

លោក Conte កាន់ពានរង្វាន់ FA Cup ដែលលោកជួយឲ្យ Chelsea យកឈ្នះ Man Utd កាលពីសប្ដាហ៍មុន (រូបថត៖ EPA)

Goal បានអះអាងថា ប្រសិនបើ Chelsea បញ្ចប់កុងត្រារបស់លោក Conte នោះលោក Sarri នឹងឡើងកាន់តំណែងអ្នកចាត់ការរបស់ក្រុមតោខៀវជាក់ជាពុំខាន។

យ៉ាងណាមិញ លោក Sarri ក៏ទទួលបានការចាប់អារម្មណ៍ពីក្លឹបរុស្ស៊ី Zenit St Petersburg ផងដែរ។ អ្នកចាត់ការវ័យ៥៩ឆ្នាំនេះ ដែលធ្លាប់ឈ្នះពានរង្វាន់គ្រូបង្វឹកឆ្នើមប្រចាំឆ្នាំ កាលពីរដូវកាល២០១៥-១៦ បានជួយឲ្យ Napoli បញ្ចប់ទៅក្នុងចំណាត់ថ្នាក់លេខ២ នៅលីគកំពូលអ៊ីតាលី រដូវកាលនេះ ដោយមាន ៩១ពិន្ទុ៕

អត្ថបទ៖ លាភ.