អង់គ្លេស និងព័រទុយហ្គាល់ ទទួលជ័យជម្នះដូចគ្នា មុនចេញទៅប្រកួត World Cup នៅរុស្ស៊ី

2018-06-08 04:34:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមអង់គ្លេស និងព័រទុយហ្គាល់ បានយកឈ្នះលើគូប្រកួតរៀងៗខ្លួន ក្នុងការប្រកួតមិត្តភាពអន្តរជាតិ កាលពីយប់មិញ មុនចូលរួមប្រកួតបាល់ទាត់ពិភពលោក នៅប្រទេសរុស្ស៊ី។

អង់គ្លេស បានប្រកួតឈ្នះក្រុមកូស្តារីកា ដោយលទ្ធផល ២-០។ ២គ្រាប់នេះធ្វើបានដោយ Rashford នៅនាទី១៣ និង Welbeck នៅនាទី៧៦។ នេះជាជ័យជម្នះលើកទី២ របស់ក្រុមតោកំណាច ក្នុងការប្រកួតកម្តៅសាច់ដុំ ត្រៀម World Cup ដោយការប្រកួតលើកទី១ គឺអង់គ្លេស បានយកឈ្នះ នីហ្សេរីយ៉ា ២-១ កាលពីថ្ងៃទី២ ខែមិថុនា ឆ្នាំ២០១៨។

Rashford ខ្សែប្រយុទ្ធរបស់ Man Utd និងក្រុមអង់គ្លេស រកគ្រាប់បាល់បាននៅនាទី១៣ ក្នុងការប្រកួតជាមួយកូស្តារីកា កាលពីយប់មិញ (រូបថត៖ Reuters)

ចំណែកក្រុមព័រទុយហ្គាល់វិញ កាលពីយប់មិញ គឺបានប្រកួតឈ្នះ អាល់ហ្សេរី ដោយលទ្ធផល ៣-០។ ៣គ្រាប់នេះ ធ្វើបានដោយ Goncalo Guedes នៅនាទី ១៧ និង ៥៥ និង Bruno Fernandes នៅនាទី៣៧។ នេះគឺជាជ័យជម្នះលើកដំបូងរបស់ព័រទុយហ្គាល់ ក្នុង ៤ប្រកួតចុងក្រោយនេះ។ កាលពីប្រកួតមិត្តភាពនៅថ្ងៃទី២ ខែមិថុនា ព័រទុយហ្គាល់ បានត្រឹមស្មើ ក្រុមប៊ែលហ្សិក ដោយលទ្ធផល ០-០។

កីឡាករក្រុមអាល់ហ្សេរី កំពុងព្យាយាមដណ្តើមបាល់ពីខ្សែប្រយុទ្ធព័រទុយហ្គាល់ Ronaldo ក្នុងការប្រកួតមិត្តភាពកាលពីយប់មិញ (រូបថត៖ Reuters)

សូមបញ្ជាក់ថា ការប្រកួត World Cup ខាងមុខនេះ អង់គ្លេស គឺស្ថិតនៅក្នុងពូល G រួមមានក្រុម ប៊ែលហ្សិក ប៉ាណាម៉ា និងទុយណេស៊ី។ ក្នុងនោះ អង់គ្លេស នឹងចាប់ផ្តើមប្រកួតលើកដំបូងជាមួយក្រុមទុយណេស៊ី នៅថ្ងៃទី១៨ ខែមិថុនា ឆ្នាំ២០១៨។ ចំណែកព័រទុយហ្គាល់ ស្ថិតក្នុងពូល B រួមមានអេស្ប៉ាញ ម៉ារុក និងអ៊ីរ៉ង់។ ព័រទុយហ្គាល់ នឹងត្រូវចាប់ផ្តើមប្រកួតជាមួយអេស្ប៉ាញ នៅថ្ងៃទី១៥ ខែមិថុនា ឆ្នាំ២០១៨៕

ប្រភព៖ BBC ប្រែសម្រួល៖ សំភី